Popular Bible Verses from 1 कुरिन्थियन 11

Share

इहइमेर से यीसु बिआरी के बाद, अंगूर के रस से भरा खोरबा लिहिन, अउर कहिन, “इआ अंगूर के रस, हमार खून आय, जउन तोंहरे खातिर बहाबा जात हय, इआ खून परमातिमा के नई करार के प्रतीक आय। अउर जब कबहूँ प्रभू-भोज के समय तूँ पंचे अंगूर के रस पिआ, त हमरे यादगारी के खातिर इहइमेर किहा।” अउर हम पवलुस इआ कहित हएन, कि जब-जब तूँ पंचे इआ रोटी खाते हया, अउर अंगूर के रस पीते हया, त जब तक प्रभू दुबारा नहीं आमँय, तब तक उनखे मउत के प्रचार करत रहते हया।

काहेकि जउन सिच्छा हमहीं प्रभू से मिली हय, त ओही हम तोंहऊँ पंचन काहीं घलाय बताइत हएन, कि प्रभू यीसु काहीं जउने रात पकड़ाबा ग रहा हय, उहय रात ऊँ एकठे रोटी लिहिन, अउर परमातिमा काहीं धन्यबाद दइके ओही टोरिन, अउर चेलन काहीं इआ कहिके दिहिन, “इआ हमार देंह आय, जउन तोंहरे खातिर दीन जात ही, हमरे यादगारी माहीं इहइमेर करत रह्या।”

एसे हरेक मनई अपने-आप काहीं खुदय निकहा से जाँच-परख लेय, अउर एखे बाद इआ रोटी काहीं खाय, अउर इआ अंगूर के रस पिअय। काहेकि जे कोऊ खाँइ-पिअँइ के समय, प्रभू के देंह के महत्व नहीं रक्खय, त उआ खाँइ-पिअँइ के द्वारा खुद काहीं दन्ड पामँइ के लाइक बनाबत हय।

एसे जे कोऊ अनुचित रूप से प्रभू-भोज के रोटी खात हय, अउर अंगूर के रस पिअत हय, त उआ प्रभू के देंह अउर खून के बिरोध माहीं अपराध करत हय।

अउर जइसन मसीह कि नाईं हमार चाल-चलन हय, उहयमेर तोंहार पंचन के चाल-चलन घलाय, हमरे कि नाईं होंइ क चाही।