Popular Bible Verses from ഗലാത്ത്യഗാറാര് 6

Share

അദ്‌നാലെ നിമ്മ നല്ല കാര്യഗാള് ഗേവാദ്‌ല് സോറ്റു പോഗാദേന്. അത്തെ സോറ്റു പോഗാദിന്ത സാമി ബെത്ത്‌റ്‌ക്കുവ ഗളിഗേക്ക് അദുക്കുള്ള കൂലി നിമാക്ക് കെ്ഡേക്ക്‌മ്.

നല്ലാദ് ഗേയ സദുവു കെ്ഡേക്കാട്ട്യെല്ല എല്ലാ ആള്‌ഗാള്‌ക്ക്‌മ് നല്ലാദ് ഗേഡൊ. മുക്ക്യമായിമ് നമാന പാസെ ഏസ്സ്‌ന നമ്പിര്‌ക്ക്‌ന്റവാര്‌ക്ക് ഒട്ടുക്കുമു ഗേഡൊ.

ബുദ്ദിമുട്ടുഗാള് ബര്‌ഗാട്ടി നിമ്മ ആങ്കീങ്ക് കയിതാങ്കുഡൊ. അത്തെ ക്‌റ്‌സ്‌ത്ത് ബെത്ത സട്ടാക്ക് കെ്ട്ട്‌പട്ട് നഡാക്ക്യ നിമാക്ക് മുഡിമ്.

നിമ്മ താനെ നിമാന ബഞ്ചിക്കദേന്. സാമിന ഏമാത്ത്യ മുഡിമെന്റ് നെനേക്കാമ് ബേ്ഡ. അവനവാന് ഗേവാദ് അവനവാന്‌ക്ക് താനെത്ത്യാമ്.

തന്ന് പിര്യാക്ക് കെ്ട്ട കാര്യഗാള്‌ന ഗേന്റവാന് ഒന്റേപെ്ട്ട് കെ്ട്ട് തള്ളുവാന്. ആന സാമിനിഗാല് സൊല്ലുക്കു കെ്ട്ട്‌പട്ട് നഡാക്ക്‌ന്റവാന്‌ക്ക് എന്നാല്‌ക്ക്‌മ് ഇര്‌ക്കുവ പെ്ളേപ്പ്‌മ് കെ്ഡേക്ക്‌മ്.

ഏസ്സ്‌ഗാറാരാന എന്ന് എ്ണേവുഗാറാരെ, നിമ്മ് കൂട്ടാത്ത്‌ല് ആരാറ്റ ഏദൊന്റു പാവാക്ക് സിക്കിന്തദാന സാമിനിഗാല് സൊല്ലുക്കു കെ്ട്ട്‌പട്ട് നഡാക്കുവ നിമ്മ താനെ അയാള്‌ക്ക് നിദാനത്തോഡ സൊല്ലി അയാള്‌ന പാവാത്ത്‌ലിന്ത് ബ്‌ഡിസി എ്ഡ്‌ക്കുഡൊ. ആന നീമ് പാവാക്ക് സിക്കാദിര്‌ക്ക്യ സൂസാരിത്ത് ഇര്‌ക്കുഡൊ.

നിമ്മ് കൂട്ടാത്തല് താന് ദൊഡ്ഡവാന് അല്ലാദിന്ത് ഗുഡി താന് ദൊഡ്ഡവാന്‌ത്തെ എന്റ് നെനേക്ക്‌ന്റവാന് തനാന താനെ ബഞ്ചിക്ക്‌ന്റാന്. ഒന്റൊന്റാള്‌മ് അവനവാന്‌ക്ക് ഇര്‌ക്കുവ ഗുണന നല്ലാദ കെ്ട്ടാദ എന്റ് അവനവാന് താനെത്തെ നോഡുഡൊ. അദ് നലമായിന്തദാന അദ്‌ന പിര്യപഡുഡൊ. അല്ലാദെ ബേ്റൊന്റൊരുത്താന്‌ക്ക് ഇര്‌ക്കുവ ഗുണാക്ക് എ്ണേത്ത് നോഡ ബേ്ഡ. എന്ത്‌ക്കെന്റ് സൊന്ന ഒന്റൊന്റാള്‌ക്ക്‌മ് ഇര്‌ക്കു ഗുണാക്കുള്ള കണാക്ക് ഒന്റൊന്റാള്‌ക്ക്‌മ് കൊഡുക്ക്യ ഇര്‌ക്ക്‌ന്റ്.