Popular Bible Verses from Rom 12

Share

Daa na kam mmeꞌ meꞌ uwahan jama ma yaꞌ pitsayaꞌ ni Almasi. Halinun bi na pamiki bi mari sikatuwaꞌ na ka pamiki Almasi. Meꞌ looy ilay, tapabahauwan na leꞌ Tuhan pangatayan bi supaya katoonan bi na kahandak na sampay tapabuwat bi na. Boꞌ inawnan kahandak Tuhan ina, mastiꞌ mahap jaꞌ, boꞌ kagak-gāk lagi maka yaꞌ luu salla na.

Sangkon siga danganakan, sabapan ehe aseꞌ Tuhan ningkitabi, junjung ku na ningkaam, suhuran bi na dī bi pa Tuhan. Ingatun bi na Tuhan dapu baran bi halloman bi llum. Labbahan bi na oy-oy arat-tabiat ma yaꞌ nulut ni kahandak Tuhan mari kam sutsiꞌ. Batan subay silay meꞌ looy meꞌ bi makitahan iya bana-bana kam ngisbat iya.

Maka pagka luu holat tabi ayad man Tuhan, subay kitabi gāk. Bila luu kasusahan tabi, tatasan tabi na sadjaꞌ. Maka bila luu paku tabi pa Tuhan, daa kitabi jamu maku.

Daa kam kuhi takoleꞌ kinawum meꞌ kalaatan, arapun buwat jaꞌ kam kaayaran man bi nalloban kalaatan.

Subay kitabi sikaaseꞌ-kaaseꞌ meꞌ kadari jama danganakan. Maka subay kitabi tinagi magmaltabat ni mimon pagkahi tabi sukuꞌ si Isa.

Na meꞌ kitabi itu sikaaseꞌ-kaaseꞌ, subay hilas aseꞌ tabi. Subay kitabi wā lammis ni kalaatan. Maka subay kitabi wā makutuꞌ kaayaran.

Pagbuli-bulihan bi mogbogan kasalassayan ka mimon jama.

Siga kakasi ku, bong luu buwat maat ningkaam, daa na kam mawos, arapun suhuran bi jaꞌ pa Tuhan. Batan yuk Tuhan njawom kitab, “Aku sa mawos; aku sa nungbasan sagannap ma buwat maat ningkaam.”

Ni kapasal meꞌ tabi maghulas-sangsāꞌ kalnaꞌ Papuꞌ Isa, daa kitabi hūk. Gam pin pupusan tabi lagi basag tabi.

Na meꞌ aku tu bay pineneꞌ binuwat disu rasul si Isa man aseꞌ Tuhan, junjung ku na ningkaam, daa kam mista dī bi langkaw man pagkahi bi. Subay kam papatong mamiki pasal dī bi batan saꞌ sina sat kaam bay sinukuan kapandoyan meꞌ Tuhan, arapun sampay mimon pagkahi bi ma pitsayaꞌ ni si Isa.

Bong jama buwat maat ningkaam, daa tungbasan bi ka maat. Maka mōꞌ kam kawul-piil ma yaꞌ tasahawi leꞌ jama.

Maka ingatun bi dī bi pantay-pantay ka siga pagkahi bi. Daa kam maglangkaw atay, gam pin subay kam mangatas panun ka jama miskin. Maka daa kam mista halul-akka gi kam man kasohean.

Na meꞌ kaam ina sukuꞌ Tuhan, sapatut na, ikutun bi jaꞌ halling njawom kitab, ilooy ma yuk na, “Bong kam ngita banta bi lingantu, pakanun bi. Bong tohoꞌ kallong na, painumun bi. Meꞌ naa ina, tud iyaꞌ sina ya ni dī na.”

Na bila luu ngalaugan kaam, daa sumpaan bi, gam pin pakuhan bi gi sila supaat man Tuhan. Bong takita bi pagkahi bi gāk, mmeꞌ du kam gāk. Bong takita bi susa, mmeꞌ du kam susa.

Maka bong pagkahi tabi sukuꞌ Tuhan kabus, subay tulung tabi. Maka daa kitabi paalang ngahulmat jama bong sila pa lumaꞌ tabi.

Mamintang kam ni baran ta, san ina disu du, meka baw kalangkapan na, maka kaniya-kaniya ka sukuꞌ da. Damikiyan, meꞌ kitabi itu binilang baran Almasi, san kitabi meka, tibuuk du kitabi. Maka siguna-guna sina kitabi saliꞌ-saliꞌ.