Popular Bible Verses from Roma 8

Share

Hiyo nihiiziwa ira jatene jinaireya, Mulugu unosakanya ira jiwande awendela pama atu anne anamuzivela Mulugu eto anno uaitanne liye mofuna mwaye.

Mwasiwa miyo dihikana ibaribari ira kilivo yengo ili yatene inawanda nimwalaniha hiyo no nizivela wa Mulugu. Nne ukwa, nne ingumi, nne angelro, nne minemba dabure, nne jengo ja tempu ili hiyo ila, nne jengo ja tempu inafuna za, nne kopolo dili datene, nne gwela zulu, nne masiki dowa vati, masiki yengo ili yatene inafwanyeya mwatene mwene mupandutchile Mulugu, kilivo yengo ili yatene inawanda nimwalaniha hiyo no niziveliwa wa Mulugu, wewo unafwanyeya muwari mwa Nabwiya wehu Yesu Kiristu.

Vamohive vevo muwari modediha, Munemba unonikamiheda hiyo tempu inavuta hiyo. Tchoira vamohi vuwa hiyo kannaiziwa pama makalelo ofwanelela ira hiyo nilobele mbwenye ora yenno Munemba unokala vari va hiyo na Mulugu, anilobelelaga, adumbelaga na makalelo ohoiziweya, anno uiziwile liye ekave.

Kodi nnafuna niwonge avi muwari mwa jatene eji? Akala Mulugu gunanisogolrelra, kodi bani unafuna nigondjiha?

Peno atu atene anafwanyeya muwari mwa Yesu Kiristu kinna mulandu uli watene.

Ale analimbela jofuna ja maningo, goma uwa ku ukwa. Ale analimbela jofuna ja Munemba, anagomela kana ingumi na murendele.

Mbwenye muwari mwa jabure jatene eji, hiyo ninnana gondjiha eto nihikwaranya vogondjiha, muwari mwa wenno unizivenle.

Daira diumbuwele upama unafuna kuma muwari mwa goyi da malambwala, miyo nnoona ira goyi nnaona hiyo malambwala kahi yengo. Goyi nnaona hiyo dihiyana na upama Mulugu unafuna liye za nioniha sogolro.

Kodi mutu guvi unafuna nimwalaniha hiyo no nizivela wa Kiristu? Kodi segedeya nari zuzumihiwa nari harahariwa nari ndala nari usiwa nari jowopiha nari piwa na supada, kodi ejo jinowanda nimwalaniha no nizivela wa Kiristu? Nari.

Mulugu wenno unaiziwa jinafwanyeya mmirimani mwa kada mutu, unoiziwa joumbuwela ja Munemba. Tchoira Munemba wenno unanilobelela vari va hiyo atu otchenihiwa na Mulugu, unalobela nnga mwemo munafunela Mulugu.

Tchoira atu atene osogolrelriwa na Munemba wa Mulugu banafwanyeya kagali ahima a Mulugu aye.

Tchoira ale anawenda na maningo, joumbuwela jiwa jinalimbela pandi ya jofuna ja maningo. Mbwenye ale anawenda na Munemba, joumbuwela jiwa jinalimbela pandi ya jofuna ja Munemba.

Tchoira Mulugu kamupoparile Mwanaye. Amurumile Mwanaye Yesu ira aze apiwe ira hiyo nikale pama. Akala Mulugu univahile Mwanaye Yesu ira nikale pama, kodi agamanle nivaha Yesu, Mulugu na sayi daye kananivaha jengo jili jatene? Unonivaha.

Munemba mwinnya gunahidedela umboni mmirimani mwehu ira hiyo niiziwe ira nili ahima a Mulugu. Muwari mokala ana Mulugu, hiyo nnoza nivahiwe upama unna Mulugu. Nnafuna nigane upama wenno Kiristu uvahiwe liye. Ira nivahiwe upama, unazela muwari mwa goyi nnaona hiyo, malringana nionihiwe goyi nnga goyi daonihiwe Yesu ira vasogolro nize nititimihiwe vamohi na liye.

Tchoira ale analimbela jofuna ja maningo anamuida Mulugu. Atu anno kinavwelela malamulo a Mulugu, tchoira kinawanda.

Vasogolro Mulugu ukana tempu inafuna liye aaoneyihe ahimaye ira iiziweye ira ahima a Mulugu ba ala. Eto fwanyeya ira jatene jopandutchiwa jinnana ing'anela zela tempu inaza Mulugu aaoneyihe ahimaye.

Tchoira hiyo nihiiziwa ira jatene jopandutchiwa na vanove jinodumbela nnga muhiyana afunaga bala.