Popular Bible Verses from Izaiya 45

Share

Nnoza duvahe jorayela jikoyiwe muisini eto nnoza duvahe jengo jokoyeya ja peresu ilukulu. Noira eno, unoza uiziwe ira miyo dili Yehova Mulugu wa Izarayeli wenno unauitana moromola nzina nawo.

Yehova eto unawonga ira: <<Nnoza dikale vasogolro vawo, disakanye ira jitukutuku jatene jikale razo, dikotole misuwo da mukuwa eto digwade magaradi a momba.

Miyo dili Yehova, kalivo mmohiwa. Hiya miyo, kaliwo Mulugu mmohiwa. Miyo nnouvaha kopolo masiki wahadiiziwileve. Nnoirana eji ira atu atene kuma makumelo wa nzuwa ante mavirelo wa nzuwa kaiziwe ira kaliwo mulugu mmohiwa ahali miyo. Miyo dili Yehova eto kaliwo mmohiwa.

Miyo nnosakanya moneya eto nnopandutcha isi. Miyo nnoziha murendele eto nnopandutcha ubure. Miyo dili Yehova wenno unairana jatene eji.

<<Nyo atene munafwanyeya magomelo wa ilambo ya vati murungunuwele wa miyo ira muvulumuwe. Tchoira miyo dili Mulugu, kalivo mmohiwa.

Yehova unawonga na osakulriwa waye Siru wenno umuhindile liye na muwono waye odjana ira agondjihe malogo a atu eto ira amalihe kopolo da amwene. Eto Yehova unohula misuwo vasogolro va Siru ira milango dahawande fungiwa.

Dihilumbela na nzina naga, vamilomoni vaga vihikuma mazu a ibaribari. Anno kiza katchindjeya. Nibodo natene nnoza nidikokorele eto nlumi nili natene nnoza nilumbelele na nzina naga.

Na mwasa wa namalaba waga Jako, na mwasa wa Izarayeli osakulriwa waga, nnouitana moromola nzina nawo, nnouvaha nzina norihediwa masiki weyo wahadiiziwileve.