Popular Bible Verses from Izaiya 43

Share

Kaing'anani, miyo nnoirana yengo ixa eto iroma oneya. Kodi nyo kamuonne? Miyo nnohula rampa mukokolani eto nnohula mihindje muisalesaleni.

Walambuwaga muwari mwa mahindje, miyo nnokala na weyo. Walambuwaga mihindje, mihindje dile kannaubwabwiha. Waviraga vamunloni, kunaja eto nne malumi a munlo kinautumeya.

Yehova unawonga ira: <<Kamuumbuwele jivirile eto kamutulele ja wanle.

Unawonga gu Yehova wenno uupandutchile we Jako, wenno uuwombile we Izarayeli. Unawonga ira: <<Kuove mwasiwa duhuwombola. Miyo duitanne na nzina nawo eto uli waga.

Voira weyo uli ofuneya valukulu vamentoni vaga eto uli waga wa vamirimani eto nnouziveliwa, nnoavelela atu malro mwa weyo. Nnoavelela malogo a atu dafunaga wombola ingumi yawo.

Mwasiwa miyo dili Yehova Mulugu wawo. Dili Mulugu Otchena wa Izarayeli eto dili Nvulusi wawo. <<Dafunaga uwombola weyo, nnoavelela aIjipitu. Nnaavaha akuda Etiyopiya na akuda Seba vamalroni vawo.

<<Kuove. Miyo dili na weyo. Miyo nnoawelihawo ahimawo uli atu makumelo wa nzuwa. Miyo nnoagumaniha ahimawo uli atu mavirelo wa nzuwa.

<<Miyo gu miyene nnatimiha joviringaniha jenyu ira undimuwa waga uoneye. Miyo kannawelela umbuwela jotega jenyu.

Yehova unawonga ira: <<Nyo muli amboni aga. Eto nyo muli namalaba waga umusakunlre miyo ira nyo muiziwe eto mudiroromele miyo eto muonelremo ira miyo dili Yehova. Kahi ira ohokalawo mulugu aliwo miyo dahanakalewo, nari. Eto sogolro uwa kuli mulugu mmohi unafuna za.

Miyo gu miyene dili Yehova. Hiya miyo kuli nvulusi mmohiwa.

Roma mukalakala wa mundulri, miyo dili. Datonga na ndanda naga, kalivo unawanda muvunela nfwaye. Mabasa analaba miyo kalivo unawanda dihiyiha.>>

Vinyama da mukokolani nnerege ditamalela. Anambwa a mukokolani na pilru da mukokolani nnerege ditamalela. Mwasiwa miyo nnavaha mahindje a mukokolani eto nnosakanya ira mihindje diwendege muisalesaleni ira atwaga osakulriwa kang'wege. Anno ba atu daawombile miyo ira kakale aga eto ira kakale atu ovweyiha joditamalela.

Nnoza daawandele atu kali pandi ya norti ira: <Mudivahe ahimaga atene.> Eto nnoza daawandele atu kali pandi ya suli ira: <Kamwaahiyihe atwaga za.> Anapongwe aga kaze kumela olapela uli atu. Anavihiyana aga kaze kumela magomelo wa ilambo ya vati uli atu. Kaze atene anaitaniwa na nzina naga, anno daapandutchile miyo ira undimuwa waga uoneye, anno daawombonle miyo eto daasakannye miyo.>>

Unawonga gu Yehova wenno unawanda sakanya ndila muwari mwa bara, unawanda helavo vovira vari va mahindje owopiha, wenno eto unawanda ziha aterelado na kavalo na nikuru na anyakondo a kopolo eto unawanda agonatiha ira kahawelele venya, so katimihiwe nnga panti yamorela mmahindjeni.

Miyo dili Yehova, Mulugu Otchena wenyu, Namapandutcha wa Izarayeli, Mwene wenyu.>>