Popular Bible Verses from Izaiya 41

Share

Weyo kuove mwasiwa miyo dili na weyo. Kukumbanye yengo mwasiwa miyo dili Mulugu wawo. Miyo nnoulimbiha eto nnoukamiheda. Miyo nnouhideda na ndanda naga nodjana na ibaribari.

Tchoira miyo Yehova Mulugu wawo nnahideda ndanda nawo na muwono odjana. Gu miyene eto nnawonga na weyo ira: <Kuove yengo. Miyo gunafuna ukamiheda.>

<<Kaing'anani, atene anajamo na we anoza kanyaswihiwe eto kakale tchulriya. Anno anauharahara kiza kakala yengo eto anoza katolowe.

Miyo dautukunle kumela magomelo wa ilambo ya vati, dohouitana kumela pandi dolapela diiraga: <Weyo uli namalaba waga. Duhusakulra eto kadutatinle.>

Waasaka anno anakanganetcha na weyo, kuza wafwanya. Anno anawana kondo na weyo anagomela hakalave yengo.

<<Kuove weyo Jako uvutile nnga mwanamungu. Nyo atu a vang'ono a Izarayeli kamuove. Mwasiwa miyo nnoukamihedani. Unawonga gu Yehova. Namawombola wenyu gu miyo Mulugu Otchena wa Izarayeli.

<<Mbwenye weyo Izarayeli, namalaba waga eto weyo Jako wenno dusakunlre miyo, weyo uli mutu wa nlogo na xamwalraga Abarahamu.

Nnoza ditwe mihindje vari va mikuma doumma. Eto nnoza dizihe visime da mihindje va ipedipedini. Eto nnoza disandutche kokola ira ikale tanki ya mahindje eto ilambo youmma inokana visime da mahindje owenda.

<<Atu osimela na atu osanyeya kasaka mahindje eto kahafwanye, vevo vanafuna atu umma vammelo na ntona, miyo Yehova nnoza divwe lobela wewa. Miyo Mulugu wa Izarayeli kadiza daahiya.

Bani airilena eji afiyeda mariha? Gwenno aromihile malogo matene a atu voroma vene. Gu miyo Yehova, miyo dili oroma eto gu miyene unafuna kala vamohi na atu ogomiheda. Gu miyene.

Nnoza dimelihe mukokolani mitengo da seduru na mitengo da mukexa na mitengo da murta na mitengo da azeti. Eto vili ilambo youmma, nnoza dizalevo mitengo nnaitaniwa faya, olimero na buxo. Nnoirana eno ira atu kaone eto kaiziwe eto kaumbuwele eto kaonelremo ira Yehova guirilena jatene ejo eto Mulugu Otchena wa Izarayeli guwandile sakanya eji.>>