Popular Bible Verses from Esaaya 58

Share

Joomiraaɗo ɗowete wakkati fuu. O haarnete fay ley ladde yoornde de o semmbinɗina terɗe maaɗa. A laatoto hono sardiŋe kaarɗo ndiyam, hono ildude ndiyam nde ndiyam muuɗum hoortataa.

Inan suumayeere nde kaajaami: Haɓɓitin haɓɓiraaɓe callali e bonnde, taƴaa ɓoggi maccungaaku, njoppaa torreteeɓe ndillida e ndimaaku de ittaa ko laatii donngal dow ko'e yimɓe fuu. Kokkaraa jolbuɗo nyaamdu, ngartiraa talkaaɓe ɓe ngalaa ɗo cuuroo ɓeen ley ɓaadeeji. Koltinaa holuɓe. Taa tottitoɗaa sakiike maaɗa?

Ndeen annoora maaɗa fooyan hono pooyngol fajiri. Semmbe maaɗa wartan law. Fonnditaare maaɗa ardete, de teddeengal Joomiraaɗo reenire gaɗa.

Ndeen a noddan de Joomiraaɗo noote. A ɗaɓɓan walleede de o jaabe o wi'a: Inani kam! Si a woɗɗinii e maaɗa gollinde golle maccungaaku, si a selii felɓude e haalude haalaaji bonɗi fu

de aɗa hokka dafaaɗo ko kaajaɗaa aan e hoore maaɗa, aɗa haarna jurminiiɗo, ndeen annoora maaɗa yaynan ley nimre, nimre maaɗa ndeen du yayniran hono hakkunde naange.

Saabe maaɗa, yimɓe nyiɓtoto bille arandeeje. A ummintinan joƴƴinirɗe jamaanuuji paltiiɗi. A noddirte cukkoowo guɗɗe kokuuji, moƴƴintinoowo laawi, faa yimɓe njooɗoo e jam.

Si a hakkilii taa kuyfinaa nyalaande fowteteende ndeen, tawa a waɗay giɗaaɗe maaɗa nyannde nyalaande am seniinde ndeen, de a inndirii nyalaande ndeen nyalaande welnde. Si aɗa wi'a nyalaande Joomiraaɗo seniinde ndeen wo nyalaande teddunde, si a teddinirii nde e yoppugol anniyaaji maaɗa, tawa a waɗay gollal maaɗa fay gootal, a haalay haalaaji ɓoli fu, ndeen a weltorto Joomiraaɗo, de mi waɗa mbaancoɗaa dow baamle leydi ndiin. Mi nyaamnete ndonngu Yaakuuba, baaba maaɗa. Wo hunnduko Joomiraaɗo wi'i noon.

Nde cuumiɗon du, wo fitina e kalala e guƴƴe bonɗe tan. Si oɗon keddii e suumoraade noon, noy keɓirton jaabaneede faa dow kammuuli toon? Yalla wo nii suumayeere nde njamirmi ndeen worri, nyalaande nde ɓii Aadama leeƴinta hoore muuɗum ndeen? Yalla wo turude hoore muuɗum hono kuɗol, naa fukkodaade e bootooru dow ndoondi? Yalla wo ɗuum ndaarduɗaa suumayeere, nyalaande nde Joomiraaɗo seyorotoo ndeen naa?