Popular Bible Verses from Maroma 12

Share

Bayi mulondeja mwelaŋawu antu amakonuku; ilaŋa yitoŋojoka yenu yibalumuki kwikala yayiha; kulonda mushinshiki mwaya muchima waNzambi, diwu wawuwahi, watiyishaŋa kuwaha, walala chikupu.

Dichi enu ana kwetu, nayilembeleli naluwi lwaNzambi, nami, lambulenu nyijimba yenu yili himulambu wawumi, wajila, wakutiyisha nachu Nzambi kuwaha; diwu mudimu wenu waya muma ana.

Zaŋalalenu mukuchiŋeja; tatakenenu hakumona yihuŋu; kakelenu kulomba chakadi kuzeya.

Kutama bayi kuyimika mushinduku; fwomonenu yatama nayayiwahi.

Keŋaŋanenu nawana kwenu nawushona; itejenu mwinenu abadiki kulema.

Kukeŋa kwenu kubuli wufwikŋi. Tiyenu kutama nayuma yatama, kakelenu yuma yayiwahi.

Neyi chikutwesheka, shakamenu chachiwahi nawantu ejima, mwejima mumukutweshela enu aweni.

Enu akwetu twakeŋa a, bayi muditendaku; kuminenu dakwovwahila kuzuwa, muloŋa anasoneki nawu, Yehova nahoshi nindi, Yami nukutenda, yami nukufweta.

Hansaŋu yatela kudikwatisha, bayi mulabaku; ikalenu neyena muspiritu, nakumukalakela Mwanta.

Naleji antu ejima adi mukachi kenu, naluwi lwananyinkuwu, nami muntu bayi aditoŋojoka kulema kwakubadika mwatelela kutoŋojokaku; Ilaŋa toŋojoki namuchima wawunda, mwayesekela dehi Nzambi antu kukuhwelela wejima wawu.

Bayi mwila mwinenu chatama nakatama kanayiliyuku. Keŋenu kwila yuma yalumbwa kumesu awantu ejima.

Ikalenu nayitoŋojoka yoyimu muntu namukwawu; bayi mudinka wantaku; dikundenu nawantu abula kulema. Bayi muditoŋojoka nenu, yetu tweluka hohuku.

Neyi chilumbu cheyi natiyi nzala, mwinki yakudya adiyi; neyi natiyi mpwila, mwinki meji anwi; muloŋa neyi mukwila mwenomu, wukumulumbikila makala akesi hanamutu windi.

Kiswilenu ayikabishaŋa nkisu; kumina dakukisula nkisu, bayi kushiŋanaku. Zaŋalalenu nawakwakuzaŋalala; dilenu nawakwakudila.

Kwashenu akwakujila nayuma yabulawu; shenu muchima kukutambula enyi.

Ilaŋa chitukweti yidi yayivulu mumujimba wumu, niyidi yejima hiyikweti mudimu wowumuku, choche nochu nawa etu tudi amavulu tudi mujimba wumu mudi Kristu, twekala chidi chamuntu namukwawu hamuntu hamuntu.