Popular Bible Verses from Filipfuɛ Mun 4

Share

Nán amun koko sa fi su, sanngɛ sa'n kwlaa nun nin like kwlaa ng'ɔ mian amun'n, an `kan kle Nyanmiɛn, an `srɛ i, an `jran su kpa, yɛ an `lɛ i ase.

Yɛ ɔ man amún wun ´jɔ amun fɔuun, amun su wun-man sa ti bɔ amun wun jɔ amun fɔuun sɔ'n i bo mlɔnmlɔn. Aunjuɛ sɔ'n man amún wla su bo-man, yɛ amun akunndan su sanngan-man sran wunmuan bɔ amun nin Krist-Jésus ti'n ti.

Aniaan mun, min ndɛ'n i atabo'n yɛ: man amun akunndan'n tran like kwlaa ng'ɔ ti kpa'n, nin sa kwlaa bɔ sran yo-ɔ ɔ ti kpa'n bé su, yɛlɛ: ndɛ nanwlɛ'n, nin like nga be bu i like kpa'n, nin like ng'ɔ ti i nuan su'n, nin sa ng'ɔ ti-man tɛ mlɔnmlɔn'n, nin like ng'ɔ ti klanman'n, yɛ ndɛ nga be ti-ɔ ɔ jɔ be klun'n.

Krist b'ɔ wla n fanngan'n ti'n, n kwla like kwlaa yo.

Sran wunmuan bɔ amun nin e Min'n ti'n ti'n, cɛn kwlaa man amun klun jɔ, n ´kɛn i ekun: man amun klun jɔ .

Like kwlaa ng'ɔ mian amun'n, kɛ min Nyanmiɛn i anyanbeun b'ɔ o Krist-Jésus sa nun'n dan'n ti'n, ɔ ´fɛ i sɔ man amun.

Like nga n kleli amun bɔ an tili an fa su'n, nin like nga an wun kɛ n yo'n, an `nian su yo, yɛ Nyanmiɛn b'ɔ man é wun jɔ ye'n, ɔ nin amun ´tran.

Man sran'm be kwlaa be wun kɛ an ti wɛtɛɛfuɛ. Ɔ cɛ kan-an, e Min'n ´ba.

Sɛ n ´di yalɛ o, sɛ n lɛ like'n kwlakwla o, n kwla tran. Lika kwlaa nga n ju nun'n, nin sa kwlaa ng'ɔ tɔ n su'n, sɛ n ku yi o, sɛ n la awe o, sɛ n lɛ like kpanngban o, sɛ ń sa mian o, Krist kleli min kɛ n `yo nan m'an kwla tran'n.

Nán kɛ ń sa mian like wie wun, ti yɛ n kɛn i sɔ-ɔ. Afin olɛ nga n wo yɛ'n, sɛ ɔ ti sɛ ti sɛ, m'an trɛn i sɔ lele ɔ'a si min wun.