Popular Bible Verses from Aliro̍om 8

Share

Alɔ jo̍ōkū hīka, la ɔjāha̍-ɔjāha̍ wa̍a̍, Ɔwɔ ē ya̍ u̍ku̍rɔ̍ ba̍la āchɛ yī nū nīi hi ɔ̍ ɔtū ma̍ wu̍chē yī ɔnɛ̄ɛhɛhi de wa̍. Āchɛ nīi o̍ hī wā ɛra̍ nīi e̍ ge̍ē ya̍ lɔkɔ nīi anu̍ ɔlɔjā miya ma̍ nɛ.

Wu̍chē oji̍ nɛ, n jo̍ōkū gblɛ̍ɛgblɛ̍ɛ hīka ɔjɔ̄jā i̍ hɔ̄ abɔ̍ɔ nīi ge̍ē de alɔ ē hwōta̍ mɛ ē hī ɔhɔtū nīi o̍ lɛ de alɔ ma̍ ni̍. O̍ ge̍ - ɔhɔ̄leyī kɛ̄ɛ ɔpīyaku̍ oo, o̍ ge̍ - ayɛ̍ɛ̄chɛ̄rɔ̄ yī Ɔwɔ kɛ̄ɛ uhu ɛha̍ nīi - alɛhu̍ kɛ̄ɛ enīi bī wɔhu̍ yī ɛbɛ abɔ̍ɔ la ichō ma̍ oo, o̍ ge̍ - lɛlā olu̍ma̍ama kɛ̄ɛ lɛlā yī ɔ̄chī iyɔ̄bū oo, o̍ ge̍ē ro̍ōre̍ka yɛchɛ nīi hɔ̄ la ichō ma̍ kɛ̄ɛ onīi hɔ̄ abɔ̍ɔ lipu̍ yī ajɛ ma̍ oo, ɔha̍lɔha̍ i̍ hɔ̄ abɔ̍ɔ nīi ge̍ē de alɔ ē hwōta̍ hī ɔhɔtū yī nū mɛ ni̍. Ɔjɔ̄jā i̍ hɔ̄ abɔ̍ɔ lipu̍ yī ɛjā wa̍a̍ nīi Ɔwɔ ya̍ ma̍ nīi ge̍ē de alɔ ē hwōta̍ mɛ ge̍ē gbo̍ hī ɔhɔtū nīi Ɔwɔ lɛ la alɔ gala abɔ̄ yī Ikra̍yisi Iji̍sɔ̄ɔsi Ādādā yī alɔ ma̍ ni̍.

Gala ɔpɔ̄pū oli̍ngɛ̍ɛ̄nɛ̄ nīi Uhu yī Ɔwɔ ē wā ge̍ tū alɔ nīi lɛ kwīkwī ma̍ wɔbɔ̄ a̍nɛ. Wu̍chē oji̍ nɛ, alɔ ɛlɛjā i̍ jɔ̍ɔkɔ nīi o̍ ngma̍ nīi alɔ ge̍ē jɔhā de Ɔwɔ ma̍ ni̍. Uhu yī Ɔwɔ ɔlɔjā ē ra̍ābɔ̄ de Ɔwɔ ē kulɛhu̍ yī alɔ. O̍ ē ra̍ābɔ̄ ɔla̍ā kpɛ̍ɛ ɛbɛ̍bɛ̍-ɛbɛ̍bɛ̍ la ɔpɔ̄pū nīi ɔ̄chɛ i̍ ge̍ē kɔ̄ka la oko̍o ē mɛ ni̍.

Alɔ de onūma̍ ka mɛ̍ ma̍, ɔna̍ bɛ̍ɛ̄nɛ̄ nɛ? Ɔwɔ ge̍ rɛ la ihi yī alɔ mɛ̍, ɔ̄nyɛ ge̍ē gba̍a ē pīyeyīta̍ alɔ ē mɛ ma̍?

Ala̍ ma̍ gɛ ko̍ō! Āchɛ wa̍a̍ nīi hɔ̄ la ongmo̍tu̍chɛ̄ ba̍la Ikra̍yisi Iji̍sɔ̄ɔsi ma̍, Ɔwɔ i̍ ge̍ē hɛ̍ wā lɛpɔ̄ ɔdwɔ̄bi̍ ni̍.

Ɛri̍ya̍ ogbōgbō yī ɔ̄chɛ ge̍ rɛ la ɔjā nīi ɔchɔ̍ɔwɔ yī ɔ̄chɛ̄ɛchɛ chikpo̍ ma̍, ɛpiyabuna yī nū - ɔpīyaku̍ nɛ. Ɛri̍ya̍ ogbōgbō yī ɔ̄chɛ ge̍ chī rɛ la ɔjā nīi Uhu yī Ɔwɔ chikpo̍ ma̍, ɔ̍lɔma̍ ɛpiyabuna yī nū - ɔhɔ̄leyī ba̍la ogbodɔ̍dɔ̍ nɛ.

Alɔ ma̍, lɛlā nūma̍ wa̍a̍ nīi ē hɔ̄ de alɔ ma̍, alɔ yɛ̍ɛ̄ngrɔ̄ɔ la aa̍ gala abɔ̄ yī Iji̍sɔ̄ɔsi Ikra̍yisi nīi yɔ̍ɔhɔtū yī alɔ ma̍ mɛ̍.

Ami ma̍, n jo̍ōkū gblɛ̍ɛgblɛ̍ɛ hīka ichi̍ ɔmɔ̍ɔ̄ma̍ nīi alɔ yɛ ē ma̍ u̍ma̍ama nūma̍ ma̍, ɔ̄chɛ i̍ ge̍ē nāa anu̍ ge̍ē kwichi̍ tāa rīgā ɔla̍ā nīi Ɔwɔ ge̍ē de ē hi̍yɛchɛ ē de alɔ la ɔ̄chī iyɔ̄bū ma̍ mɛ ni̍.

Bɛ̍ɛ̄nɛ̄ ma̍, oji̍ kpɛ̍ɛ ge̍ē de alɔ ē hwōta̍ hī ɔhɔtū nūma̍ nīi Ikra̍yisi lɛ de alɔ ma̍? Ichi̍ ɔmɔ̍ɔ̄ma̍ ge̍ē hwō alɔ ē ta̍ mɛ ma̍, kɛ̄ɛ akanya, kɛ̄ɛ ichi̍ ɔdwɔ̄bi̍ nīi e̍ ē ya̍ alɔ ma̍? Lɛmiyɛ, kɛ̄ɛ yeklo̍, kɛ̄ɛ ɔkpalɛ̄kā ɔha̍, kɛ̄ɛ ɔpīyaku̍ ge̍ē de alɔ ē hwōta̍ mɛ ma̍? Ɔjɔ̄jā i̍ ge̍ē ya̍ i̍ngɔ̍ɔ ē mɛ ni̍!

Wu̍chē lɔkɔ nīi Ɔwɔ ē ma̍ ūkpɔ̄tū yī āchɛ wa̍a̍ ma̍, o̍ ē je̍ ɔjā nīi Uhu yī Ɔwɔ yɛ ē gbɛri̍ya̍ ma̍. Wu̍chē oji̍ nɛ, Uhu yī Ɔwɔ yɛ ē ra̍ābɔ̄ de Ɔwɔ kulɛhu̍ yī āchɛ yī nū gala ɔgɔgu lɔkɔ nīi Ɔwɔ ɔlɔjā chikpo̍ ke̍e̍ ma̍.

Āchɛ nīi hɔ̄ gala ɔgɔgu yī Uhu yī Ɔwɔ ma̍, aa̍ - ayi̍ yī Ɔwɔ a̍nɛ.

Wu̍chē oji̍ nɛ, āchɛ nīi ē hɔ̄ lɔkɔ nīi ɔchɔ̍ɔwɔ yī ɔ̄chɛ̄ɛchɛ ka ɛ̍lɛ ge̍ ya̍ ma̍, ɔjā nīi ɔchɔ̍ɔwɔ yī ɔ̄chɛ̄ɛchɛ chikpo̍ ma̍ nīi ɛri̍ya̍ ogbōgbō yī wā rɛ la anu̍ a̍nɛ. Āchɛ nīi ē chī hɔ̄ lɔkɔ nīi Uhu yī Ɔwɔ ka ɛ̍lɛ ge̍ ya̍ ma̍, ɔjā nīi Uhu yī Ɔwɔ chikpo̍ ma̍ nīi ɛri̍ya̍ ogbōgbō yī wā rɛ la anu̍ a̍nɛ.

Ɔyi̍ nīi - Ɔyi̍ yī anu̍ ɔlɔjā ma̍, o̍ i̍ de ɔ̍ lā ga okwi̍ihi hī alɔ ni̍, o̍ de ɔ̍ nāa de la ɔpɔ̄pā wu̍chē yī alɔ wa̍a̍. Bū la ɔla̍ā, alɔ jo̍ōkū gblɛ̍ɛgblɛ̍ɛ hīka, lɔkɔ nīi o̍ de Ɔyi̍ yī nū nāa de wu̍chē yī alɔ ma̍, i̍ngi̍ngɔ̍ɔ nīi o̍ ge̍ē de ɔjāha̍-ɔjāha̍ wa̍a̍ ē kɔ̄kɔ̄ de alɔ ē mɛ a̍nɛ.

Bū la ɛbɛ ɔla̍ā, Uhu yī Ɔwɔ ba̍la uhu yī alɔ ē ngmo̍tu̍chɛ̄ de lɛlā chāyenyi hīka aɛ̍lɛ - ayi̍ yī Ɔwɔ nɛ. Wu̍chē lɔkɔ nīi alɔ - ayi̍ yī Ɔwɔ nɛ ma̍, alɔ ge̍ē nāa ɔpiyɛ ɔla̍ā wa̍a̍ nīi Ɔwɔ de lā de āchɛ yī nū ma̍. Alɔ chī ge̍ē gba̍a ē bɔ̍ɔ̄ba̍ ē lɛ ɔjā nīi Ɔwɔ de lā de Ikra̍yisi ma̍ ba̍la anu̍. Wu̍chē oji̍ nɛ, alɔ ge̍ mi̍chi̍ ba̍la Ikra̍yisi, ɔ̍lɔma̍ o̍ re̍ka alɔ ge̍ nāa rīgā i̍ngi̍ngɔ̍ɔ ba̍la anu̍ titi.

Bū la ɛbɛ ɔla̍ā, ɔ̄chɛ nīi ɛri̍ya̍ ogbōgbō yī nū ge̍ rɛ la ɔjā nīi ɔchɔ̍ɔwɔ yī ɔ̄chɛ̄ɛchɛ chikpo̍ ma̍, ɔlɔjā de ē pīya oluji yī Ɔwɔ. Wu̍chē oji̍ nɛ, o̍ i̍ chɛ̄ gbō lihɔ yī Ɔwɔ ni̍. O̍ i̍ u̍tu ge̍ē de ɔ̍ gbōgbō mɛ o̍bo̍o̍bū ni̍.

Ɛjā wa̍a̍ nīi Ɔwɔ yɔ̍ɔ̄ya̍ ma̍ yɛ ē gbēyī hɔ̍ɔ̄hla̍ gba̍a̍ la oge̍ ma̍ olo̍ nīi Ɔwɔ ge̍ē de ayi̍ yī nū hi̍yɛchɛ ma̍.

Alɔ jo̍ōkū hīka ɔkpɛɛ ku u̍ma̍ama nūma̍, ɛjā wa̍a̍ nīi Ɔwɔ yɔ̍ɔ̄ya̍ ma̍ yɛ ē ti̍iru. Wɔnɔ nīi hɔ̄ de wa̍ ma̍ lɛ bāa iyī ɔnyā nīi yɛ ē lwɔ̄ɔma yī ɔyi̍ ɔmɔ̄ma ma̍.