Popular Bible Verses from Romanos 8

Share

Wax na'atik ja Dyosi, wa'n schapjel spetsanil b'a slekil ja ma'tik wax yajtaji yuji, ja iti, ja'ni ja ma'tik stsa'unej jastal wa sk'ana ja Ye'n.

Ja ke'n wax na'a lek mini jas oj b'ob' spil'otik ja b'a syajal sk'ujol ja Dyosi: Mini ja sak'anili, sok mini ja chamel ch'akeli, mini ja anjel jumasa, mini ja pukuj jumasa, mini sok ja ya'n, sok mini sok ja b'a ti jakumi, Mini sok ja ma'tik jel ja yip teye b'a satk'inali, mini sok ja yip ja wokol jumasa, sok mini ja yip ja jas sk'u'lunej ja Dyosi. —Mini jas oj b'ob' spil'otik ja b'a syajal sk'ujol ja Kajwaltik Jesusi—.

Cho jach'ni, ta yuj k'a jel ko'el ja sniwanil jk'ujoltik sok ja Dyosi, Ye'n oj skoltayotik ja Espiritu Santo. Yuj ja mix na'atik jastal oj k'umuktik ja Dyosi, Ye'n ja Espiritu Santo oj sk'an pavor yuj ja ke'ntiki, ja Ye'n mi tukuk ja jas wa sk'u'lani, ja ke'ntiki mixax ta'a jas oj kaltik.

Jasunk'a oj kaltiki, ta yuj k'a tey jmoktik ja Dyosi, mini jun ma oj b'ob' yuj, b'a mi oj yilotik leka.

Ja'yuj ja janek' ti'xa aytik sok ja Jesusi, mixa oj k'i'tik wokol.

Kechan, ta ja ita k'a wajel jk'ujoltik oj k'u'luktik spetsanil ja jas mi lek wa sk'ana oj sk'u'luk ja jkwerpotiki, ja jastal jawi, pilani aytik sok ja Dyosi. Ta ja k'a wajel jk'ujoltik oj k'uluktik ja jas wa sk'ana ja Espiritu Santo, ojni jta'tik ja jsak'aniltik b'a mi oj ch'akuki, cho lamani oj ajyukotika.

B'a yojol spetsanil ja jwokoltik jumasa, wax na'atik lek Ye'n ja Kajwaltik Jesús ja ma' jel syatayotiki oj ni ya' k'ultik ganara.

Wax na'a lek ja wokol jumasa wa'n ek'el kujtik ja ya'n lajan sok mi jas wa'n ek'el kujtik, yuj ja mini oj b'ob' slaj ja tsamal jsak'aniltik oj ya'kitik lajan sok ja Dyosi.

¿Machunk'a oj b'ob' spil'otik ja b'a syajal sk'ujol ja Jesusi? Mini jas oj b'ob'uka sok mini jun ma' jas oj b'ob' yuj ja. Mini sok ja ab'al k'umal jumasa, mini sok ja wokol jumasa, sok mini ja ixtalajel jumasa. Cho mini ta yuj k'a wax jak jun niwan wa'in ma' niwan che'e, cho mini ta wax jak jun jastik b'a xiwela sb'aj sok mini ja chamel ch'akeli.

Jaxa Dyosi, wa sna'a spetsanil ja jas wa'ntik spensari, wa sna'a ja jas wa sk'ana ja yal ja Espiritu Santo. Yuj ja Espiritu Santo wa'n sk'anjel yi pavor ja Dyos yuj ja yuntikil mi tukuki, jaxa jas wa sk'ana, lekni ay sok ja jas wa sk'ana ja Dyosi.

Spetsanil ja ma wa sk'u'an ja jas wax yala ja Yespiritu ja Dyosi, jaxa ni yuntikilex ja Dyosi.

Ja ma' ja wajel sk'ujol oj sk'u'luke ja jas jel xk'ank'uni oj sk'u'luke'i, kechan ja wajel sk'ujole oj sk'u'luke ja b'a mi lekuki. Jaxa ma ja' wa sk'u'an ja jas wax yala ja Espiritu Santo kechani ja wa sk'ana oj sk'u'luk ja jas wa sk'ana ja ye'na.

Ja Dyosi, mini t'un yala mi oj ya' ja yunini, man skulan entregar b'a oj cham yuj ja ke'ntiki, ja'yuj ojtoni ya'kitik lajan spetsanil ja jastik junuka.

Ja Yespiritu ja Dyosi, wa sta'a sb'aj sok ja jb'ajtiki, wax cho ya'a sniwanil k'ujoltik ke yuntikilotikxa ja Dyosi. Yuj ja yuntikilotikxa, ja'yuj jb'ajtikxa ni spetsanil ja jas lek chapan yuj b'aj oj ya'kitiki. Spetsanil ja jawi ojto jk'ep jb'ajtik sok ja Jesusi ta yuj k'a ki'ajtik wokol ja ke'ntik jastal yi'aj wokol ja Ye'n, ja smeranili, lajani oj toyjukotik sok ja Jesusi.

Ja ma'tik jel xk'ank'uni yuj oj sk'u'luk ja b'a mi lekuki yujni kechan ja wajel sk'ujol oj sk'u'luk ja jastik b'a mi lekuki. Mi lekuk xyila sb'aj sok ja Dyosi, yuj ja mi sk'ana sok mix b'ob' sk'u'uke ja smandar ja Dyosi.

Spetsanil ja jastik k'u'lub'ali, wa smajla oj sje' kitik ja Dyos jpetsaniltik ja ke'ntiki, yuj ja yuntikilotik xa.

Ja ke'ntiki wax na'atik ja swinkil ja lu'um iti, wa'nexta k'umal yuj ja jel wax yi'aje ja wokoli, ja lajan sok ja yajni jun ixuk kuchan yuj niwan chamel ja yajni ojxa sman ja yalatsi.