Popular Bible Verses from Exodo 12

Share

—Ja a'kwal jawi, oj b'ejtes spetsanil ja na'itsaltik b'a Egipto, oj ch'ak jmil spetsanil ja sb'ajtanil yuntikil ja egipsiano, yuntikil kristyano ma yuntikil chante ojni ch'ak chamuka, ke'n Dyos yujon ja israelenio, oj ch'ak sna'jel jas dyose b'a Egipto. Jaxa we'nlex israelenio jumasa mok xiwanik; ja chik' oj ja jax ex yi ja ste'il ja b'a wax ajyi ocheli, oj makunuk lek kuj. Yajnix kila ja chik' jawi, mi jas oj k'u'lyi wa wuntikil we'nlexi, toj oj e'kon.

—Man ya'n a petsanilex t'ilan oj ja k'u'lukex ja k'in it b'a oj ja toy'onexi, b'a ti oj jak a k'ujolex ja k'ak'u ka elanik ja b'a Egipto. Ja k'ini oj alb'uk juke (7) k'ak'u, oj ja tul'ex yi b'a och k'ak'u chan lajune (14) yajtab' ja ixawi, oj waj ch'ak man b'a och k'ak'u jun tajb'e june yajtab' ja ixawi. Ja semana jawi, oj ja k'u'lukex chab' niwak tsomjel, june' oj ja k'u'lukex ja sb'ajtanil k'ak'u, jaxa juni ja oj ja k'u'lex ja sjukil k'ak'u. Chikan b'a ayex ek' ja juke k'ak'u jawi, t'ilan oj ja we'ex waj b'a mey yi'oj levadura. Man sb'ajtanil k'ak'u ja k'ini, man b'a sjukil k'ak'u, mini june ma oj b'ob' snol xe'n waj sok levadura b'a snaji. Ja ma oj swe' waj sok levadura ja yojol ja juke k'ak'u jawi, oj nutsxuk el ja b'a yoj chonab'i, a'nima israelenio ma pilan chonab'. Cho jach'ni spetsanil ja juke k'ak'u jawi, mini ma oj b'ob' a'tijuka; kechan oj b'ob' a tojb'esex ja wa wa'elex oj ja wabyexi. Ja iti jun ab'al sb'a petsanil k'ak'u.

Jaxa yajni oj sjob' ja wa wuntikilexi, ja sb'ej ja k'in iti, jaxa we'nlexi ti oj ja wal'ex yabye'a, ja wa'el iti, ja sb'a sya'al k'inal yuj ja wax k'ulantikon jun sk'inil b'a jtoyotikon ja Dyos kujtikoni. Yuj ja yajni sb'ejtes ja chonab' Egipto ja ch'ak smil spetsanil ja sb'ajtanil yuntikil ja egipsiano, jaxa b'a jnaj ke'ntikoni mi jas k'u'lan toj ek'i. Yajni ch'ak k'umanuk ja Moisesi, spetsanil ja israelenio jumasa ch'ak ko'uke mek'an stoyowe ja Dyosi