Popular Bible Verses from aRooma 1

Share

Nkinuulihiwa muru niwoko na masu ooreeraxa, niwoko ti ikuru sa Muluku singwera waavuluxa ootheene anroromela, woopacera aYuda ni wanaaveeli aGrego.

Vano, mwa masu ooreeraxa onimooniheriwa waakhuleleya wa Muluku. Okhuma ompacereroni mpaka ommaleloni, waakhuleleya wu ti niwoko na nroromelo, ntoko elempwaaya: “Yoole onaakhuleliwa ni Muluku niwoko na nroromelo, anaakhale ni okumi.”

Okhuma ephattuwelo ya elapo ya vathi, mikhalelo soohooneya sa Muluku, ntoko ikurusawe, soohimala, ni omulukwaawe, saahooniwa nnenesene. Iyo siiwexexiwa mwa itthu soopattuxiwa, moota wooweera atthweene yaawo ari oohileveleleya.

Vano, emusuwelaka Muluku, khayaamvuwihale ntoko Muluku, hata khayaamutthapenle, mene soowuupuwelasaya saathatuwa sa siiyo, ni mirimasaya sa ololo saathatuwa epiphi.

Yaahaakakhanyiha ekhaikhai ya Muluku ni wootha, ni yaalapa ni yaarumeela itthu soopattuxiwa, omuhiya Mpattuxa ori ooreelihiwa mahuku ootheene, Ame*.

Isara sa Muluku sinoonihereya wiirimu ni ohitteela wootheene ni yoonanara yootheene ya atthu enooceeliha ekhaikhai.

Tivawo Muluku aavaherenraawe soohaawela soowuuliha muru. Mpaka axaaraya yaahaakakhanyiha okona ni alopwana, ekonaka ni asithiyana akhwaaya, ehiyaka ikhalelosaya ntoko athiyana. Mooteene yoowo alopwanatho yaahiya okona ni athiyana, ni yaahaawelaxa okona ni akhwaaya. Yaapacera opaka miteko soowuuliha muru, alopwana ni alopwana, ni yaahaakhela asineenaaya yoottaruxa yoophwanela niwoko na mitekosaya. Woonaka weera awo yaaramusa osuwela wa Muluku, Owo muneenaawe ohaahiya ni soowuupuwelasaya soonanara, weera epake yeeyo yahaatthuneya opaka.

Yaari mwiixeerelaru asuweli, yaathatuwa alolo. Awo yaahaakakhanyiha ovuwa wa Muluku oohimala ni icaambulo soopakiwa soolikana ntoko mutthu onkhwa, hiiho ntoko ipalame, inama ni axiitthu aniipurula.