Popular Bible Verses from 1 Timoteo 1

Share

Murighëëtyo urui në wa tutë na uvii unoneye ughenyifwa na uwuhuvëa, mwino Kiristo Yesu wajie mu urëmi uvatyoa anya mahutye. Na nene në munya mahutye wa mwandyo ukëra voong'e.

Ëgweeso gusoko nene naa në muhutii ukëra voong'e Muungu agaraghëëra gëhe gakwe kunë nene. Kiristo Yesu agaraghëëra ughimu wakwe kunë nene ëtëndeke nyinkhori gwa avoo unë vëjie umuhuvëa mweeso na uhanga ufanga wa khae na khae.

Soko a iraghëëyo ërëi rëuvasacha ahuvëi viyanje veeso gwa veeso gwa uyanjo nëufumie u nkhoo në njija nanë uhuvëi wa tutë.

Kunë Mutëmi wa khae na khae, në atiukuyaa, në atidwëëre, Muungu umwedu, ëtëndeke ukumu nanë ikuryo khae na khae. Amini.

Sese gumanyie, mwino chu seria iyii inafunywaa gwa antu nëvëumuyanjisya Muungu ëgweeso gwa antu nëvëtikwatëëre seria nanë anya gëdida. Kangë seria ëyëë afunyinywe gwa antu nëvëtiumukuryaa Muungu nanë anya mahutye, gwa antu nëtiveru nanë antu nëvëmuhwëtë Muungu, gwa antu nëvëuvauraghaa va ihe nanë avoo nëvëuvauraghaa va nyinya, nanë gwa antu nëvëuvauraghaa antu gëkaku. Gunto a avaa, seria afunyiywe gwa antu në avaya, gwa aghosya nëvëgilehadaa na aghosya vauya, antu nëvëuurinjaa antu vauya, vëegheeghe, antu nëvëusudangëa uregheeghe nanë antu nëvëutëndaa gëntu gëkaku në gëhiya na masëyo nëënoneye na aGekiristo.