Popular Bible Verses from Aisea 51

Share

Iwe, ewe Samol mi Lapalap a apasa, “Ngang ewe üa achipok. Pwota ka niueiti aramas mi mäkai, ir upun won aramas mi wewe ngeni fetil?

Ngang ewe üa ameresala läng o föri longolongun fanüfan, üa üreni ekewe aramasen Jerusalem, ‘Ämi nei aramas kana. Üa ngenikemi ai kapas o aopakemi fän nürün pei.’”

Oupwe aüselingaei, ämi mi silei mine a pwüng, ämi aramas mi amwöchü ai allük lon lelukemi. Ousap niueiti kapasen esit me ren aramas, ousap pwal apilükingau ren ar aitengauakemi.

Ngang ewe Samol mi Lapalap üpwe achipa Jerusalem o eäni tong ngeni meinisin mi imweimw lon ekewe imw mi tala. Üpwe föri pwe fanüan mi pön epwe wewe ngeni Eten, nge fanüan mi pwas epwe wewe ngeni ai tanipi. Pwapwa me mwänek epwe fis lon, pwal kilisou me kölün mwareitiei.

Iwe, chokewe mi manau me reöm repwe liwinsefäl ngeni Jerusalem fän köl. Pwapwa esemüch epwe nonom rer, chengel me mwänek repwe etiir, nge letipeta me ngüngüres repwe sü seniir.