Popular Bible Verses from Domano Ma̧ȩ 9

Share

Ado pio ju̧i̧iä yo̧requededibe ca̧ oti̧. Danȩrȩ, pumȩ pio judi ma ja̧didë. Judi chjadëri̧ japea̧ pio ju̧i̧iädë. Judi chjai̧dëri̧ japea̧ pio ju̧i̧iädë. Jabo jabechji̧, Ütë tjamo̧ pio judide. Tjamo̧ mitëmȩ pio judide. Jibëa̧ ma̧na̧ri̧ jo̧rȩtamȩrȩ mitëde cjäri̧ri̧ cjia dapea̧ oa.

Danȩrȩ, Ütë tjamo̧ judi Moiche pio ju̧i̧iäpȩmo̧ ni̧bärërea̧ ji̧, pio ju̧i̧ jo̧rȩtarequede. Ja̧di ta̧rëri̧ yo̧a̧dejȩ: “Pio cüdë jo̧rȩta̧mi̧ mitërequede pumȩ ju̧i̧ cjäri̧ri̧ cjia dapea̧ oa, chjadëri̧ a̧dopea̧ oa. Ca̧ea̧ ma̧na̧ri̧ jo̧rȩtamȩrȩ mitërequede.” Aja̧, ja̧di ta̧rëri̧ yo̧mȩrȩ yo̧rëremȩde Moiche pio ju̧i̧iäpȩmo̧.

Jabo cjäri̧ madirȩ, ja̧di ta̧rëri̧ yo̧rea̧mi̧dëde. Danȩrȩ, jabomo̧ pumȩrea̧rȩ a̧ro̧rȩ. Ütë tjamo̧ pio ju̧i̧ nö̧tadë marea̧ro̧jo̧ȩ. Ado pio ju̧i̧iäpȩmo̧ ma̧ȩ goaedëra̧ dëbë yo̧rea̧mi̧dëde. Danȩrȩ, dabu yocodë üdë ni̧bärea̧ chiarä judi, pio jȩa jëdano̧mȩ pio ju̧i̧iäpȩmo̧ ni̧bärea̧ chiarä judi, ma̧ȩ goaedëra̧ dëbë yo̧dë matäremȩdejȩ. “¿Jabo tjana̧ ju̧i̧iä ja̧di dari̧ cjiamȩ oa jëdano̧a̧renȩque?” yo̧mȩrȩ yo̧dëtäremȩdejȩ. “Jabo cjäri̧ marenȩque, oëra̧ jëdano̧a̧renȩque” yo̧rea̧mi̧dëde.

Ado pio ju̧i̧iä yo̧requededibe. Danȩrȩ, Ütë tjamo̧ pio judide. Jibëa̧ ma̧na̧ri̧ jo̧rȩtamȩrȩ japamȩde jënȩ ütarë jo̧rȩta̧mi̧. Pio judi ütarë jo̧rȩta̧mi̧ mitëdejȩ pumȩ oa cjäri̧ri̧ cjia dapea̧ oa, chjadëri̧ a̧dopea̧ oa. Ado peaja̧di jënȩ ütarë jo̧rȩta̧mi̧ mitëdejȩ pumȩ oa chjuari̧ jiadapea̧ oa, pjarao̧ pio judimi̧ dari̧ cjiapea̧ oa.

Jabechji̧ dabu yocodë oa jëdano̧mȩ judi, jabechji̧ jënȩ jo̧rȩta̧mi̧ jëdano̧dejȩ. Dabu coëcoëa oa mitë ëte, chopamȩrȩ jëdano̧dejȩ, jënȩ jo̧rȩta̧mi̧. Cja̧rȩmȩ daburemȩra̧ pio ju̧ri̧ra̧ jëdano̧de yo̧a̧ri̧ oa. Cja̧rȩmȩ oa jëdano̧dejȩ ui boeapea̧ oa. Ado chjacjiamȩri̧ jëdano̧dejȩ ba chia dapea̧ oa. Jabo ado cja̧rȩmo̧ oa ba chia dapea̧ oa jëdano̧dëdejȩ. Chjacjiamȩri̧ jëdano̧dëdejȩ. Jabechji̧ chjacjiamȩdëri̧ jëdano̧dejȩ aeno̧pea̧ maearë chapea̧ oa. Aja̧, ja̧di dari̧ japamȩrȩ jëdano̧de jëdano̧mȩ üdë. Dabu yocodë oa japamȩ tara, jabechji̧ jënȩ ütarë jo̧rȩta̧mi̧ jëdano̧de chjadë maea oa.