Popular Bible Verses from Ichaia 53

Share

Jabo cjäri̧ made, chjai̧dëri̧ japea̧ ma ja̧didë. Pio judi chjai̧dëri̧ japea̧ oaiä japadëa̧dejȩ Ütë tjamo̧ judi, jabo pio a̧ro̧rȩ chjai̧dëri̧ japea̧ pio ju̧i̧iä conȩda̧ oa cjiarëremȩde. Jabechji̧ ibëa̧ ba oaiä bape chjaoa̧ oa cjiarëremȩde. Ibëa̧ chjai̧dë gȩrȩ pio ju̧i̧iä bide cjaeäa̧ oa cjiarëremȩde. Danȩrȩ, judi conȩda̧ oa cjia̧ pio oaiä, chjaparȩa̧ oa cjiami̧ dari̧ cjiadiärëreji̧ri̧rea̧rȩ. Judi gito ana̧ri̧ tara̧ pio oaiä, chjätärea̧ darëreji̧ri̧rea̧rȩ.

Danȩrȩ, pumȩ judiro̧ ütëborë dabadëpea̧mi̧ dari̧ cjo̧ro̧dirȩ. Oveja üdë jidamȩ pio ju̧i̧ a̧dë baämi̧ dari̧ cjo̧ro̧ marea̧rȩ, dabadëpea̧mi̧ dari̧. Coëma cjiari̧ jämi̧ dari̧ cjo̧ro̧dërea̧rȩ jabo ibëa̧ ma̧na̧ri̧ jo̧rȩtaji̧ri̧rȩ cjo̧ro̧rea̧rȩ. Ibëa̧ ma̧na̧ri̧ jo̧rȩtaji̧ri̧rȩ japarea̧rȩ. Jabechji̧ ji̧dë ma chjai̧dëri̧ jape chjaoji̧ri̧rȩ cjo̧ro̧rea̧rȩ. Jabo a̧ro̧rȩ chjai̧dëri̧ japea̧ chjö̧na̧i̧därä oa pio ju̧i̧iäpȩmo̧ ma cjiadiärëremȩde, pio judi ano̧ mire arapea̧ oa. Tjamo̧ davä. Jeova pio judi tänȩa̧ oa, pio ju̧i̧iäpȩmo̧ ma cjiadiäa̧de. Ado pio ju̧i̧iäpȩmo̧ ano̧ mire acji cjatärëremȩdejȩ Ütë ja̧ ërecjia̧ üdë, pio a̧ro̧rȩ chjai̧dëri̧ japea̧ pio ju̧i̧ tuti ara̧ oaiä.

Jabo danȩrȩ, pio ibë chjiari conȩda̧ oa cjiarëremȩde. Pio ibë chjiari gitoi̧ dari̧ tararëremȩde. Jabo pumȩ judiro̧, cjäri̧ madiro̧jo̧ȩ, pio ju̧i̧ chjiari chjadëri̧ jo̧rȩtadërëreji̧ri̧diro̧jo̧ȩ. Jabechji̧ judiro̧ oëra̧ jo̧rȩta̧ ji̧, 'Aja̧, conȩda̧ oa cjiadida, gitoi̧ dari̧ cjiadida, jabo pio judi chjai̧dëri̧ japea̧ ba oa taradida, Ütë tjamo̧ pio judi bape chjaoa̧ oa tara jirodida' quëna̧ jo̧rȩtaji̧ri̧rȩ daea̧diro̧jo̧ȩ.

Tjamo̧ davä. Pumȩ judiro̧ pio ju̧i̧ ba chia datärea̧ ji̧, a̧dë dae chjaoa̧diro̧jo̧ȩ. Pio ju̧i̧ nö̧ta ëba cjiatämi̧ cjiaji̧ri̧rȩ dadëa̧diro̧jo̧ȩ. Chjai̧dëri̧ japamȩmi̧ da oa daea̧diro̧jo̧ȩ. Pio ju̧i̧iä jabechji̧, badë daea̧diro̧jo̧ȩ. Badë tjamo̧ oa, teracaba oa daea̧diro̧jo̧ȩ. Ado pio ju̧i̧iä gito ana̧ri̧ jo̧rȩtariä cjo̧ro̧rëremȩde. Odi̧ tarari̧ jo̧rȩtamȩrȩ, gitori̧ jo̧rȩtamȩrȩ cjo̧ro̧rëremȩde pumȩ judiro̧ pio jȩa ji̧dë ma conȩda̧ oaiä. Ado pio ju̧i̧ chjuari̧ jiada̧ oaiä, jabechji̧ cjäri̧ri̧ cjiaji̧ri̧rȩ dadëa̧diro̧jo̧ȩ.

Danȩrȩ, ma̧i̧ dari̧ conȩda̧diro̧jo̧ȩ. Goae tjamo̧dëri̧ ya̧e chjaoa̧diro̧jo̧ȩ. Jabo judiro̧ ja̧di dari̧ japea̧räbo, jabechji̧ ba dëbë ya̧dëa̧dejȩrȩ. Ba dëbë ërecjiadëa̧dejȩrȩ. Jabechji̧ cjapiri̧ cjiarëremȩde ovejami̧ dari̧. Danȩrȩ, oveja üdë ja̧bobea yaboi̧, cjapiri̧ cjiade. Ado jibëa̧ cö̧ oa täa̧ ji̧, peaja̧di cjapiri̧ cjiade. Ado peaja̧di dari̧ cjiarëremȩde Jeova ja̧ mu̧i̧tjoi̧ üdë. Cjapiri̧ cjiarëremȩde ma̧i̧ dari̧ conȩdaräbo.

Jabo danȩrȩ, ja̧di dari̧ ja̧botä earëremȩdejȩ Jeova judi. Gito ana̧ri̧ jo̧rȩtariä ja̧botä earëremȩdejȩ. Jabechji̧ Jeova judi ütarë jo̧rȩtarërea̧mi̧ ja̧bo tänȩrea̧ yürürëremȩdejȩrȩ, pumȩ ütëbodärärë duridëparȩa̧ oa cjiapea̧ oa, judiro̧ chjai̧dëri̧ japea̧ üdë duridëparȩa̧ oa cjiapea̧ oa. Aja̧, pio ju̧i̧iä ja̧bo tänȩrea̧ yürürëremȩdejȩrȩ. Jabechji̧ pio judiri ja̧mȩ pio ju̧i̧ cja̧rȩmȩ oa ëbadërërea̧ ji̧, jibëa̧ pumȩ no̧i̧dë tjamo̧ oa ëbamȩrȩ cjo̧ro̧mȩpe bagapade jënȩ pumȩ pio ji̧ri̧ chjiari ano̧ mire ja̧boa̧ pio ju̧i̧iä. Jabechji̧ Jeova judi pearä judi ütarë jo̧rȩtarërea̧ üdë coëma cjiari̧ cjiadiärëremȩde jibëa̧ mu̧i̧tjoi̧ pio ju̧i̧iä, o ji̧ri̧ chjiari ano̧ mire ja̧boa̧mȩ pio ju̧i̧iä.

Jabo judiro̧ jiada̧räbo, jabechji̧ ütarë jo̧rȩtarërea̧mi̧ japamȩde Jeova judi. Ado pio ju̧i̧iä jabechji̧, ma̧ chiadëri̧ cjiamȩrȩ darëremȩdejȩ jibëa̧ mu̧i̧tjoi̧ oa. Aja̧, pea buiua̧ toi̧mi̧ damȩ oa, dabu gaüri pio judiri buiua̧mȩ toi̧mi̧ da oa ma̧ chiadëri̧ cjiamȩrȩ darëremȩdejȩ, ütëpe jäa̧mȩ oa. Jabo a̧ro̧rȩ pio ju̧i̧ irä daea̧rä judi, chamacho chjacjiamȩ tjamo̧dëmi̧ da oa daea̧täreji̧ri̧rea̧ro̧jo̧ȩ. Pio ju̧i̧ irä daea̧rä judi, jabechji̧, pio ju̧i̧iäpȩmo̧ earea̧ taradëa̧täreji̧ri̧rea̧ro̧jo̧ȩ. Pio ju̧i̧iäpȩmo̧ daea̧ üdë, ma̧ chiadëri̧ cjiari̧ jo̧rȩta tänȩdëa̧täremȩdiibe.

Tjamo̧ davä. Nȩmȩpadëa̧de Jeova ja̧ mu̧i̧tjoi̧ judi, jabo jibëa̧ icjara oa yürürëremȩde pumȩ pio ji̧ri̧ chjiari ano̧ mire ja̧bopea̧ oa, pumȩ ja̧ chjai̧dë pio ju̧i̧ tuti arapea̧ oa. Ado pumȩ judiro̧ pio ju̧i̧ chjadëri̧ datärea̧ ji̧, cjäri̧ madiro̧jo̧ȩ, chjadëri̧ dadëa̧diro̧jo̧ȩ jabo a̧dë chjäte chjai̧dëri̧ japamȩmi̧ da oa darëreji̧ri̧diro̧jo̧ȩ. Jabo danȩrȩ, chjai̧dëri̧ japadëa̧de, jabo chjai̧dëri̧ japaji̧ri̧ pio ji̧ri̧ chjiari goë cjo̧dë chjaorëremȩde ji̧dëri̧. Ado pio ju̧i̧iä a̧dë chjäte ba chia tjamo̧räpȩ cha tänȩrëremȩdejȩ Jeova judi. Ado peaja̧di tjamo̧ yo̧mȩrȩ cjo̧ro̧rea̧ yürürëremȩdejȩ —yo̧mȩrȩ yo̧rëremȩde Ichaia judi, Ütërë ea jana̧ chjadüa̧ oa ni̧bämȩ pio judi.

Ado Jeova ja̧ mu̧i̧tjoi̧ üdë, coëma cjiari̧ cjo̧ro̧mȩ mu̧i̧tjoi̧ pio judi, jabechji̧ gito ana̧ri̧ conȩda̧ oa cjia ëte, o ji̧ri̧ chjiari ano̧ mire ja̧bo ëte, jabechji̧ a̧dë chjäte ma̧ chiadëri̧ cjiamȩrȩ cjo̧ro̧mȩpea̧de. Aja̧, ma̧ chiadëri̧ cjiamȩrȩ cjo̧ro̧mȩpea̧de ja̧di dari̧ jo̧rȩtamȩrȩ: 'Aja̧, badëri̧ conȩda̧ oa cjiadëa̧quëda, badëri̧ ja̧bodëa̧quëda jabo jabechji̧ pumȩ ja̧ chjai̧dë oa tuti aramȩrȩ ja̧boa̧quëda, judiro̧ cja̧rȩmȩ co chjai̧dëri̧ japadëji̧ri̧mi̧ dari̧ cjiadiäpea̧ oa ja̧boa̧quëda, jabechji̧parȩa̧ oa cjiadiro̧da yaba̧, pio ju̧i̧iä ma̧ chiadëri̧ cjia tjamo̧quëda' quëna̧ jo̧rȩtarëremȩde.

Tjamo̧ davä. Ërecjia tjamo̧ji̧ri̧rȩ acji mitë ëte, ëba baärëreji̧ri̧diro̧jo̧ȩ chjaodëri̧ ja̧bo tänȩpea̧ oa, jëreeaji̧ri̧rȩ ja̧bo tänȩpea̧ oa. Tjamo̧ davä. Tjamo̧ cjo̧ro̧ji̧ri̧ judiro̧ chjadëri̧ ütaratärea̧ ji̧ japadëa̧diro̧jo̧ȩ, jabo chjadëri̧ ütaradë ëte ëba baäa̧diro̧jo̧ȩ ja̧bo tänȩpea̧ oa. Ado eami̧rȩ pio ju̧i̧ chjiari goë tuti ni̧bätärea̧ ji̧, chjai̧dëri̧ japadëmȩ pio ju̧i̧ chjiari goë tuti ni̧bätärea̧ ji̧, cjäri̧ madirȩ, a̧dodëa̧diro̧jo̧ȩ. Jabechji̧ ja̧bo tänȩrëreji̧ri̧diro̧jo̧ȩ. Aja̧, pumȩ judiro̧ chjai̧dëri̧ japea̧ pio oaiä, ja̧borëremȩde.

Jabechji̧ chjai̧dëri̧ japamȩmi̧ da pio ju̧i̧ ja̧bo tänȩrëreji̧ri̧diro̧jo̧ȩ chjai̧dëri̧ japadëa̧räbo. Chjai̧dëri̧ japaji̧ri̧ pio ji̧ri̧ nö̧ta ja̧bo tänȩrëreji̧ri̧diro̧jo̧ȩ. Ado jibëa̧ icjararemȩ pio ju̧i̧ chjai̧dëri̧ japaji̧ri̧ pio ji̧ri̧ nö̧ta na̧ra̧ oa cjiatärea̧ ji̧, cjäri̧ madiro̧jo̧ȩ, ju̧ri̧pȩ na̧ra̧dëa̧diro̧jo̧ȩ, jabo chëre ji̧ra̧ri̧ goamȩ pio ju̧i̧ ja̧ na̧ra̧rea̧räpȩ na̧ra̧diro̧jo̧ȩ. Tjamo̧ davä. Ado cja̧rȩmo̧ pumȩ pio ju̧i̧iäpȩmo̧ chjai̧dëri̧ japadëa̧räbo, jibëa̧ yara̧ cja̧rȩmȩ co chjai̧dëri̧ ni̧bädëa̧räbo, ja̧bo tänȩrëreji̧ri̧diro̧jo̧ȩ.