‘Inta to’oka tau etu,‘Komi mandudu ngkani damangandonge pei komi taa damangansani batuanginya gombo to nudonge ngkomi etu. Komi damangalo’a-lo’aka pei komi taa seja damangansani batuanginya palaong to nukita ngkomi etu.’
Etu semo gombo to ratulisika yami tau to bo’onya mampodongeka etu. Roo see i Nosa Mapasing manganto’oka i Yesaya, to’oNya,
‘Tau si’i mako’o wo’onya. Sira re’e mangaba’a talinganya pasi mangampirinaka matanya.
Naka pei sira mangika ewa wetu apa sira bo’onya mangkita pasi bo’onya seja mangandonge.
Pasi naka pei sira bo’onya mangkita bara mangandonge apa sira taa rani rapakanasaka raya nsira.
Sira taa rani mangandolika tango nsira resi Aku. Pei ane rapanya sira mangandolika tango nsira resi Aku, ane ewa see Aku maya mangansawang sira see sira damasingkatao muni pei Aku. Pei sira bo’onya.’
Etu semo gombo i Nosa Mapasing tempo owi.”