Popular Bible Verses from Jueces 7

Share

Ö̦jö däjä, abenaja Jeobaa a cuma, Jedeoni lija. —Wa bä ca̦i wayu lä cule bä bluca dicowä ja, ö̦jö bä lija Madianateli ya bä noshi nia ö̦jödaboimi. Camiyä wale lofote dablaö mlajei, cama bä nofi shi̦lo doablamou dicoicu. “Camiyä yamacö lofotenö yamacö nö wa̦lojama”, bä cuu dicoicu.

Jedeoni lija abenaja Jeobaa a cuu nomöjöoma. —Ubä lä naco nacomano wejei wa bä 300 fa nocamalänö, bämacö nia bayeliblaö. Cafä wamacö lija Madianateli ya bä noshi nia ö̦jödabou. Ai bä lä cui, cama bä yanobö jamö bä bluca co̦oblobä —a cuma.

¿Ö̦jö tawä? Bä bluca da yömöla, ö̦jö lä. Abenaja wa bä nowa tabä. “Wamacö lä quilii wei, wamacö shi̦lo cu̦jamöbä”, wa bä nowa ta —a Jeobaa cuma. Jedeoninö bä quilii wabaö fa showadaonö, 22,000 bä co̦layoma. Cama lija 10,000 bä cuo showao fe yadioma.

Ö̦jö däjä, Jedeoni lija Jeobaa a wa̦ faö co̦oma. —Ma. Bä bluca showawä dicowä —a cuma—. Bei. Mau u jamö bä cai̦ fuu da nomöjöo, ö̦jamö ya bä wabaö co̦obä. Cafä lijamö, “Ei a yauobä”, ya cuu ja, ö̦jö wa nia shi̦lo yaumabou. Ai ya wa̦fa wäyäö ja, “Ei a nia nocaomi”, ya cuu ja, ö̦jö wa nia yaumaboimi —a Jeobaa cuma.

Ö̦jö cudeenö, mau u jamö Jedeoninö bä ca̦i wayu fudayoma. Ö̦jamö, abenaja Jeobaanö a nowa taö nomöjöodayoma. —Ji̦ima bänö ubä naco nacomaö lä culajeinaja bä lä cuaaö wei bä lä cui, bä nia yaio. Bä jo̦tolanö ubä lä coaö wejei, ö̦jö bä ca̦i nia yaio mö feduo —a nowa tama. Bei. Bei imicönö ubä fa ji̦quejenö ubä lä naco nacomano wejei, 300 bä cuoma. Ai bä bluca lä cuinö, bä jo̦tolanö ubä coamaje.