Popular Bible Verses from Taitus 1

Witin nani bila Gâd ra kakaira nani wisa, sakuna ai daukanka nani ba ni lika apia wisa. Witin nani ba uya saura pali baman sa, sip bawras uplika nani bara wark yamni kumi sin daukaia aitani apia banhwisa.

Ani uplika nani ai sinska klin bri ba mapa ra, diara sut ba klin sa; sakuna kasak lukras uplika nani bara ai sinska sin klin briras ba mapa ra lika, diara kumi sin klin âpu sa, kan witin nani sinska ba bara ai kupia dara walra ba sin tâski baman sa.

Sturi kasakkira witin ra smalkan ba kat, ban alki bri kaia sa, bara baku mika upla wala nani ra smalkanka pain yabi, witin sip kabia tâ baikaia, bara baha smalkanka mapara nani ba sin kupia alkaia.

Kan ani uplika pura kakaira warkka bri ba, witin lika Gâd warkka nani ba ai mihta ra brisa, bara baha mita witin pât kumi sin âpu kaia sa. Witin ba lal karna kaia apia sa, daukanka saura bri uplika kaia apia sa; bla tatakra kaia apia, unsasabra sin apia, saurka lâka wina lalah alkaia apia. Sakuna, piu bani upla wala nani ai watla ra briaia wilin kaia sa; diara yamni dauki uplika kaia sa, ai sinska pain bri kaia, kasakkira, holikira bara ai kupia alki takaski kaia.

Serts almukka kum ba, pât kumi sin âpu kaia sa; witin ai maya mairin kumi baman bri kaia sa, bara ai luhpia nani ba lalukra nani kaia sa; baha nani nina ra, saura yan sturka bara upla bîla sip wali daukras sturka sin âpu kaia sa.