Popular Bible Verses from Roma 8

Share

Torang tau ini: sapa saja yang sayang pa Tuhan Allah deng so dapa pangge la iko Dia pe mau, apa saja yang jadi pa dorang, mo bae ka, tara bae ka, torang tau, Tuhan Allah mo biking samua itu untuk dorang pe bae.

Kita yakin skali, tara ada satu yang bisa kase pisa pa torang dari Yesus Kristus pe sayang. Jadi biar torang masi hidup atau so mati, Tuhan tetap sayang pa torang. Malaekat-malaekat deng setang-setang me tarada kuasa untuk mo kase pisa pa torang dari Tuhan pe sayang. Apa saja yang mo jadi skarang atau nanti, Tuhan tetap sayang pa torang. Biar lagi kuasa-kuasa yang ada di langit deng di bumi atau apa saja yang ada, tara ada yang bisa biking sampe torang tapisa deng Tuhan Allah pe sayang karna apa yang Kristus Yesus, torang pe Tuhan so biking.

Bagitu lagi Tuhan Allah pe Roh mo tolong pa torang kase kuat torang pe hati waktu torang rasa tong pe percaya tara kuat. Jadi waktu torang berdoa, torang tara tau apa yang Tuhan Allah mau supaya torang mo bilang, tapi Tuhan Allah pe Roh yang tolong pa torang untuk kase turus pa Tuhan Allah apa yang torang mo bilang pa Tuhan Allah deng cara yang torang sandiri tara mampo bilang deng kata-kata.

Kalu torang inga samua yang Tuhan Allah so biking untuk torang, torang musti yakin Tuhan Allah ada sama-sama deng torang. Jadi sapa yang mampo lawan pa torang? Tarada, to?

Jadi, skarang Tuhan Allah so tara hukum lagi pa torang karna torang so satu hati deng Kristus Yesus.

Orang-orang yang hidup cuma iko manusia pe mau yang suka biking dosa, dorang itu nanti mo dapa hukum tapisa deng Tuhan Allah slama-lamanya. Tapi kalu orang-orang yang hidup iko Roh Kudus pe mau, dorang pe hati salalu rasa tenang. Deng dorang itu mo hidup deng Tuhan Allah slama-lamanya.

Tapi, biar torang mo dapa samua susa itu, itu tara akan bisa kase kala pa torang, mala torang lebe tamba menang karna Yesus Kristus sayang deng tolong pa torang.

Kita yakin, torang pe sengsara yang torang dapa skarang di dunia ini, itu cuma kacil kalu kase banding deng sanang yang luar biasa yang nanti Tuhan Allah mo kase pa torang.

Kong tarada satu yang bisa kase pisa pa torang dari Yesus Kristus pe sayang. Biar torang menderita, sengsara, siksa, kelaparan, tarada baju, cilaka, atau mo dapa bunu lagi, tapi Yesus Kristus tetap sayang pa torang.

Tuhan Allah yang tau skali manusia pe dalam hati. Dia me tau Dia pe Roh pe maksut. Barang, Roh itu kase turus Tuhan Allah pe umat pe doa, iko Tuhan Allah pe mau.

Orang-orang yang Tuhan Allah pe Roh pimpin, dorang itu suda Tuhan Allah pe ana-ana.

Orang-orang yang hidup cuma iko manusia pe mau yang suka biking dosa, dorang itu cuma pikir barang yang tara bae yang biking sanang dong pe diri sandiri, tapi kalu orang-orang yang hidup iko Roh Kudus pe mau, dorang itu cuma pikir barang yang bae yang biking Roh Kudus itu sanang.

Dia pe Anak sandiri saja Dia tara tahang-tahang, tapi Dia kase sampe mati di kayu salib supaya tebus torang pe dosa. Karna itu, torang jadi tau, apa saja yang bae untuk torang, pasti Dia kase.

Torang tau, tong ini Tuhan Allah pe ana-ana karna Dia pe Roh yang biking torang yakin pa tong pe hati. Deng karna torang ini so jadi Tuhan Allah pe ana-ana, nanti tong mo dapa warisan dari Dia, itu berarti, torang ini me ada hak dari samua yang Dia so kase sadia untuk Dia pe ana-ana. Kong torang mo dapa samua itu sama-sama deng Yesus Kristus. Tapi kalu torang mau dapa itu, tong lagi musti menderita iko pa Tuhan Allah sama deng Yesus Kristus so menderita, supaya torang nanti dapa puji deng hormat sama-sama deng Dia.

Barang, orang-orang yang hidup cuma iko manusia pe mau yang suka biking dosa, dorang itu jaga malawang pa Tuhan Allah. Dorang tara iko Tuhan Allah pe aturan, karna memang dorang tara mampo iko aturan itu.

Karna itu, samua yang Tuhan Allah so cipta di dunia ini, ada tunggu-tunggu waktu Tuhan Allah mo kase tunju sapa Dia pe ana-ana.

Torang me tau, dunia deng samua dia pe isi skarang ada mengelu karna rasa susa deng sengsara. Itu sama deng parampuang yang rasa saki sementara tunggu dia mo melahirkan.