Popular Bible Verses from Roma 12

Share

Jang ngoni iko dunia ini pe mau. Lebe bae ngoni kase biar la Tuhan Allah ruba ngoni pe pikiran jadi baru supaya ngoni pe kalakuang me beruba. Karna deng ngoni pe pikiran yang baru, ngoni bole tau Tuhan Allah pe mau: yang bagus, yang butul, deng yang biking Dia pe hati sanang.

Sudara-sudara, Tuhan Allah bagitu kasiang pa torang. Karna itu, kita minta butul-butul pa ngoni: serakan suda ngoni pe diri pa Tuhan Allah untuk iko Dia pe mau, itu sama deng ngoni pe hidup so jadi korban persembahan pa Dia. Ngoni kase ngoni pe hidup jadi Dia punya, deng ngoni hidup untuk biking Dia pe hati sanang. Itu baru bilang ngoni pe ibada itu butul.

Ngoni musti sanang suda, karna torang bole baharap deng yakin pa Tuhan. Ngoni musti sabar biar dapa siksa, deng ngoni lagi musti rajin berdoa!

Jadi, jang ngoni balas yang jahat pa orang yang biking jahat pa ngoni, supaya yang jahat itu tara kase kala pa ngoni. Tapi lebe bae ngoni balas yang bae pa dorang. Deng ngoni biking yang bae, itu berarti, ngoni so kase kala yang jahat.

Ngoni so sama deng basudara, jadi ngoni musti baku-baku sayang. Kong tiap orang musti lebe kamuka hormati turus-turus pa orang laeng lebe dari yang orang laeng biking.

Ngoni musti sayang orang butul-butul, jang foya-foya! Ngoni musti binci samua barang yang jahat, kong ngoni biking suda samua yang bae.

Kong ngoni berusaha hidup dame turus deng samua orang, apalagi hidup dame itu musti ngoni yang kamuka biking!

Sudara-sudara yang kita sayang, jang ngoni balas pa orang yang biking jahat pa ngoni, tapi kase biar suda Tuhan Allah yang mo hukum. Karna ada tatulis di Kitab Suci bagini, “Kita yang pe hak untuk mo balas. Kita yang mo hukum.”

Ngoni karja deng rajin untuk Tuhan, jang ngoni pamalas. Ngoni karja untuk Tuhan itu deng smangat.

Tuhan Allah kase Dia pe bae pa kita, sampe Dia so pili pa kita. Karna itu, kita kase nasehat pa ngoni bagini: jang ngoni pikir tinggi-tinggi tentang ngoni pe diri. Tapi lebe bae ngoni pikir yang pas tentang ngoni pe diri, iko ngoni pe percaya yang Tuhan Allah so kase pa ngoni satu-satu.

Kalu ada orang yang biking jahat pa ngoni, jang ngoni balas biking jahat lagi pa dia. Tapi ngoni musti pikir bae-bae apa yang bae yang ngoni musti biking supaya samua orang me lia itu bae.

Ngoni musti hidup satu hati deng ngoni pe sudara-sudara yang percaya. Jang basombong tapi musti batamang deng sapa saja, biar orang itu orang laeng anggap dia tara arti. Kong jang ngoni anggap ngoni pe diri so pande!

Jadi ngoni biking suda sama deng yang tatulis di Kitab Suci bagini, “Kalu ngoni pe musu lapar, kase makang suda pa dia. Kalu dia aus, kase minum suda pa dia. Karna kalu ngoni biking bagitu pa ngoni pe musu, nanti dia mo jadi malu sandiri.”

Kong kalu ada orang yang biking siksa pa ngoni, ngoni musti minta pa Tuhan Allah kase yang bae pa dia. Inga! Ngoni musti minta Tuhan Allah kase yang bae, bukang kutuk. Turus, kalu ada orang yang sanang, ngoni iko sanang sama-sama deng dia. Kong kalu ada orang yang manangis, ngoni iko manangis sama-sama deng dia!

Ngoni musti tolong pa orang-orang yang so jadi Tuhan Allah pe umat yang pe hidup kekurangan. Kong ngoni musti tarima pa orang-orang di ngoni pe ruma deng hati sanang.

Ambe conto dari torang pe badan. Pa torang pe badan ini, ada kaki, tangan deng laeng-laeng lagi, kong samua itu ada dia pe tugas masing-masing. Bagitu lagi deng torang. Biar torang banya orang, tapi tong so jadi satu sama deng torang ini satu badan karna torang so percaya pa Yesus Kristus. Kong torang samua baku perlu satu deng laeng, sama deng kaki, tangan deng yang laeng-laeng baku perlu.