Popular Bible Verses from Roma 1

Share

Kita tara tako kase tau Kabar Bae tentang Yesus Kristus pa orang-orang, karna Kabar Bae itu ada kuasa dari Tuhan Allah yang bisa kase slamat pa samua orang yang percaya dari dosa-dosa. Kong bukang cuma orang Yahudi saja yang mo dapa slamat, tapi orang-orang yang bukang Yahudi lagi mo dapa slamat.

Kabar Bae itu ada kuasa dari Tuhan Allah, karna Kabar Bae itu kase tau bagimana supaya torang bole jadi orang yang tara sala pa Tuhan Allah pe muka. Dia pe cara, torang musti percaya pa Tuhan Allah, tarada cara laeng. Itu sama deng yang so tatulis di Kitab Suci bagini, “Orang yang percaya pa Tuhan, dia itu yang Tuhan biking jadi orang yang tara sala pa Tuhan pe muka, kong dia yang mo hidup deng Tuhan Allah slama-lamanya.”

Karna so dari dulu waktu Tuhan Allah biking dunia ini sampe skarang, biar manusia tara lia pa Dia, tapi manusia bole tau tentang Dia. Dorang bole tau Dia pe kuasa yang mo ada turus-turus, deng dorang me bole tau, Dia itu Tuhan. Jadi tarada alasan bilang dorang tara tau Tuhan Allah itu ada.

Dorang so tau Tuhan Allah itu ada, tapi dorang tara puji deng hormat pa Dia. Dorang me tara bilang tarimakasi pa Dia. Dorang so tara pikir tentang Dia tapi dorang cuma pikir barang yang tarada dia pe guna, deng dong pe hati so tara mangarti apa yang butul.

Apa yang butul dari Tuhan Allah, dorang tara iko. Dorang so tara puji deng semba pa Tuhan Allah yang so cipta langit deng bumi, mala dorang cuma puji deng semba pa apa yang Tuhan Allah so cipta. Padahal cuma Tuhan Allah saja yang pantas dapa puji slama-lamanya. Amin.

Tuhan Allah yang ada di sorga mara pa manusia yang tara iko Dia pe mau deng yang jaga biking barang yang jahat. Apalagi dorang pe kajahatan itu me biking orang laeng tara iko ajaran yang butul tentang Tuhan Allah.

Jadi karna dorang so tara semba lagi pa Tuhan Allah, Dia kase biar pa dorang iko dorang pe napsu tara bae yang biking malu dong pe diri sandiri. Parampuang-parampuang so tara suka pa laki-laki, mala dorang cuma baku suka deng parampuang saja. Bagitu lagi deng laki-laki. Dorang so tara suka pa parampuang, mala dorang cuma iko dong pe napsu yang tara bae yang cuma baku suka deng laki-laki saja. Padahal apa yang dorang biking itu biking malu dong pe diri sandiri. Jadi dorang akan mo dapa hukuman yang pas iko deng apa yang dorang biking itu. Deng karna dorang rasa dong tara perlu tau tentang Tuhan Allah, jadi Tuhan Allah kase biar dorang pe pikiran yang tara guna itu kuasai pa dorang. Dia pe ahir kabawa, dorang biking barang yang tara pantas dong biking.

Dorang bilang kata, dorang pande, padahal sebenarnya dorang itu bodo. Dia pe ahir kabawa, dorang tara semba pa Tuhan Allah yang hebat deng yang hidup slama-lamanya. Mala dorang cuma semba pa patong yang cuma sementara saja ada di dunia ini. Patong itu pe model sama deng manusia, burung, binatang yang dia pe kaki ampa, deng binatang yang jaga maraya.