Popular Bible Verses from Isaías 60

Share

Levántate, brilla, que a túa luz xa chegou; si, a gloria do Señor resplandece sobre ti.

Certo que os pobos camiñarán coa túa luz e os reis co resplandor do teu alborexar.

Pois, olla, a escuridade encobre a terra e a negrura os pobos, pero sobre ti resplandece o Señor e a súa gloria faise ver sobre ti.

O máis pequeno volverase un millar, e o máis miúdo, un pobo poderoso. Eu, Iavé, dareime présa para realizalo ó seu tempo.

Non che volverá a servir o sol de luz durante o día, nin te alumará o resplandor da lúa, senón que o Señor será a túa luz eterna e o teu Deus será a túa luminosa gloria.

Non se volverá a pór o teu Sol e a túa Lúa non desaparecerá. Si, o Señor será a túa luz eterna e acabaranse os días do teu loito.

Entón, cando o vexas, estarás radiante e o teu corazón latexará e ensanchará, pois as riquezas do mar traeránseche a ti e os bens dos pobos virán para ti.

Levanta os teus ollos arredor, todos estes xuntáronse, viñeron a ti. Os teus fillos veñen de lonxe e as túas fillas son traídas no colo.

Todos os do teu pobo serán xustos e posuirán a terra eternamente, (serás) xermolo dos seus plantíos, obra das súas mans para que se mostre a súa gloria.

Non se volverá a oír falar de violencia no teu país, nin de saqueo e de arraso dentro dos teus confíns. "Salvación" será o nome dos teus muros e o das túas portas "Loanza".

As túas portas estarán sempre abertas, non se pecharán nin de día nin de noite, para que che traian as riquezas dos pobos, traídas polos seus reis.

Estarás cuberta dunha chea de camelos, de dromedarios novos de Madián e de Efah. Todos eles virán de Sabá. Virán cargados de ouro e incenso, e proclamarán ledos a loanza do Señor.

Os fillos do estranxeiro reconstruirán as túas murallas, e os seus reis estarán ó teu servizo, pois pola miña ira castigueite, pero polo meu amor tiven compaixón de ti.

En vez de estares abandonado, aborrecido, e sen xente que por ti pase, convertereite en esplendor eterno, en causa de gozo por xeracións e xeracións.

Mamarar o leite dos pobos e do peito dos reis mamarás, entón recoñecerás que eu son o Señor, o teu Salvador, si, o teu Redentor, o Forte de Xacob.