Popular Bible Verses from फलिप्पी 1

Share

मुंह आसा ऐहा गल्‍लो भरोस्सअ कि ज़ुंणी परमेशरै तम्हां दी बधिया काम करनअ शुरू किअ, तेऊ ई करनअ सह ईशू मसीहे फिरी एछणें धैल़ी तैणीं पूरअ।

हुंह करा एही प्राथणां कि तम्हैं एकी-दुजै लै झ़ूरी, ज्ञैन अर सोभी रंगे सोर-समझ़ा दी होर बी बझ़दै लागे। हुंह करा ऐहा गल्‍ला लै बी प्राथणां कि परमेशर तम्हां का ऐहा गल्‍ला रहैऊए कि तम्हैं भली का भली गल्‍ला परखी झ़ूरी करे अर ज़ेभै मसीहा स्वर्गा का फिरी एछणअ तेभै तैणीं रहे तम्हैं मानदार अर नर्दोश बणी।

किल्हैकि मुंह रहणअ ज़िऊंदै मसीहे तैणीं अर मरनअ आसा मुल्है होर फाईदअ।

ज़ेभै-ज़ेभै मुंह थारी आद एछा, तेभै-तेभै करा हुंह तम्हां लै परमेशरो शूकर।

सिधअ एतरअ करा कि थारअ च़ाल-च़लण लोल़ी मसीहे खुशीए समादा जोगी हुअ, च़ाहे हुंह तम्हां सेटा एछी भाल़ूं, च़ाहे नां बी एछूं, पर थारै बारै लोल़ी मुंह इहअ शुणना लै भेटअ कि तम्हैं आसा एकी आत्मां दी टेक्‍की रहै दै, अर एक मन्‍न हई खुशीए समादे विश्वासा लै आसा मैन्था करदै लागै दै।

मुंह आसा ऐहा गल्‍लो च़ाअ अर आशा कि ज़ुंण मुंह मसीहा लै करनअ लागा तेथ निं लोल़ी हुंह कधि शर्मिंदअ हुअ। पर ऐबै आसा मुंह एतरी हिम्मत कि ज़ेही मेरी देही करै परमेशरो अदर हंदअ रहअ तिहअ लोल़ी आजू बी हंदअ रहअ, च़ाऐ हुंह ज़िऊंदअ रहूं या मरूं।

किल्हैकि मसीहा पिछ़ू आसा तम्हां लै इहअ जश हुअ द कि नां सिधअ तेऊ दी विश्वास करा, पर तेऊए तैणीं ज़िरा दुख बी।