Popular Bible Verses from इब्रानी 11

Share

विश्वास आसा एतो निहंचअ कि हाम्हां भेटणीं तिंयां गल्‍ला पाक्‍कै दी ज़ेते हाम्हैं आशा डाहा अर भरोस्सअ करनअ कि ज़ुंण च़िज़ा हाम्हैं भाल़ी निं आथी तिंयां आसा असली दी। म्हारै दादा-बाबो त इहअ ई विश्वास। तैही त परमेशर तिन्‍नां करै खुश।

ज़ै लोग विश्वास करे, तेता करै सका परमेशर खुश हई, किल्हैकि परमेशरा सेटा एछणैं आल़ै लोल़ी विश्वास किअ कि सह आसा। ज़ुंण शुचै मन्‍नैं परमेशरा लोल़ै हआ लागै दै तिन्‍नां लै दैआ सह तेतो फल।

विश्वासा करै ई लागा हाम्हां का थोघ कि सारअ भ्रमंड आसा बणाअं द परमेशरै आपणैं बैणा करै। ज़हा च़िज़ा हाम्हैं भाल़ा, तिंयां बणाईं परमेशरै तेता करै ज़ेता हाम्हैं भाल़ी निं सकदै।

आबरामै बी किअ विश्वास अर तेऊ किअ तिहअ ई ज़िहअ परमेशरै तेऊ लै बोलअ त। सह लागअ परमेशरे गल्‍ला दी विश्वास करी आपणैं देशा गराऊंआं छ़ाडी तेऊ देशा बाखा लै हांढदअ ज़ुंण परमेशरै तेऊ लै दैणअ किअ त। तेऊ का निं थोघ बी त कि किधा लै डेऊणअ पर तज़ी बी लागअ सह हांढदअ। ज़ुंण देश परमेशरै आबरामा लै दैणअ किअ त, तिधी रहअ आबराम परदेसी ज़िहअ खिम्भ खल़अ करी तेऊ डेरै दी। तिहै ई तेऊओ शोहरू इसहाक अर तेऊओ पोचअ याकब ज़हा परमेशरा का सह ई करार भेटी, तिंयां बी रहै खिम्भा दी।

नूहै किअ परमेशरै खोज़ी दी तिन्‍नां गल्‍ला दी विश्वास कि आजू हणीं पाणीं करै प्रल़या ज़ुंण तेऊ ज़मानैं भाल़ी नां हेरी ती। तिन्‍नां गल्‍ला दी विश्वास करी बणाअं तेऊ परमेशरे डरा हेठै रही एक बडअ ज़हाज़ ज़ेता करै सह अर तेऊए सारै टबर बच़ै। इहअ करै संसारे होर लोग ज़ुंणी विश्वास निं किअ तिंयां मूंऐं सोभ अर नूह बणअ विश्वासा करै धर्मीं।

हणोक करा त परमेशरा दी विश्वास अर सह निंयं परमेशरै तेऊए ज़िऊंदी ज़िता स्वर्गा लै। तैही निं कोही तेऊए ल्हास भेटी। स्वर्गा निंणै का आजी किअ तेऊ परमेशर हर गल्‍ला दी खुश, इहअ आसा तेऊए बारै पबित्र शास्त्रा दी लिखअ द।

आदमीए शोहरू आबलै किअ परमेशरा दी विश्वास, तेऊ च़ढाऊअ परमेशरा लै आपणैं बडै भाई कैना का राम्बल़अ बल़ीदान। परमेशर हुअ आबले बल़ीदाना करै खुश अर तेऊ लै बोलअ परमेशरै आप्पै कि सह थिअ धर्मीं। आबल ता नाठअ मरी पर हाम्हैं शिखल़ा आझ़ बी तेऊ का परमेशरा दी विश्वास करने बारै।

आबरामै किअ विश्वास अर परमेशरै दैनअ तेऊ लै इहअ बल कि तेऊओ हुअ शोहरू तेभै गअ त सह खास्सअ प्रोढअ हई अर तेऊए लाल़ी सारा बी थिई बांढी अर प्रोढी गई दी हई। परमेशरै बोलअ तैहा लै कि तेरअ हणअ एक शोहरू अर आबरामै किअ भरोस्सअ कि परमेशरा करनअ तिहअ ई ज़ेही तेऊ करार आसा किई दी।

किल्हैकि तिंयां थिऐ स्वर्गे तैहा सदा रहणैं आल़ी नगरी न्हैल़ै लागै दै, ज़ेते पाक्‍की आथरी आसा अर ज़ेतो कारीगीर अर बणाणैं आल़अ परमेशर आप्पै आसा।

मिसर देशे माहा राज़ेए देई निंयं मोसा; संघा बणाअं आपणअ शोहरू। पर ज़ांऊं सह ज़ुआन हुअ, विश्वासा ई करै किअ तेऊ नांईं कि सह आसा राज़ेए देईए लुआद। तेऊ समझ़अ इहअ ठीक कि थोल़ै धैल़ै पापा दी सुख-भुगतणै का आसा परमेशरे लोगा संघै दुख भुगतणअ ई भलअ। तेऊ समझ़अ मसीहा पिछ़ू, परमेशरा लै बेइज़ती हणअ तेऊ मिसर देशे ज़ैदात अर भढारा का खास्सअ ठीक। किल्हैकि तेऊ का थिअ थोघ कि तेऊ भेटणअ तेतो फल स्वर्गै। किल्हैकि मोसा किअ परमेशरा दी विश्वास तैही छ़ाडअ तेऊ मिसर देश। तेऊ निं ऐहा गल्‍लो फिकर किअ कि तेऊए मिसर देशा छ़ाडणैं करै हणअ राज़अ तेऊओ दुशमण। सह लागअ हांढदअ किल्हैकि सह रहअ तेऊ परमेशरा भाल़अ लागी ज़हा कोहै निं भाल़ी सकदअ।

विश्वासा करै ई आबराम ज़धू परखअ त, तेऊ निंयं आपणअ शोहरू इसहाक बल़ीदान करना लै। ज़सरै बारै परमेशरै करार ती किई दी।

राहाब ती कंज़री पर तैहा किअ विश्वास, अर तैहा दैनअ तिन्‍नां इज़राईली मणछा लै लुक्‍की रहणा लै आसरअ ज़ुंण जेरिहो नगरीए भेद लंदै तै आऐ दै। इहअ करै निं सह तिन्‍नां मणछा संघै मारी ज़ुंण परमेशरो बरोध करा तै।

विश्वासा करै ई डेऊऐ इज़राईली मणछ लाल समुंदरा बाती पारा बाखा लै इहै, ज़िहै शुक्‍की ज़ैगा बाती हांढा! अर ज़ांऊं मिसर देशे राज़े सपाही बी तिहअ ई किअ, तिंयां मूंऐं सोभ समुंदरै पाणीं दी डुबी।

किल्हैकि इज़राईली मणछ करा तै परमेशरा दी विश्वास, तिंयां रहै साता धैल़ी तैणीं जेरिहो नगरीए दुआली फेर फेरी दैंदै लागी। तेखअ ढूल़ी दुआल। ज़िहअ परमेशरै तिन्‍नां का बोलअ त।

विश्वासा करै ई मनी तेऊ ऊवार्णे अर मिम्मूंए लोहू छ़ल़िकणें बिधी, कि ज़ेठै शोहरू मारनै आल़अ दूत इज़राईली मणछा लै कोई हान्‍नी नां करे।

युसुफै किअ परमेशरा दी विश्वास, ज़ांऊं मिसर देशै तेऊए मरने घल़ी पुजी, तेऊ खोज़ी इज़राईलीए मिसर देशा का आज़ाद हणें गल्‍ला अर तेऊ डाहअ आपणैं लोगा का बोली कि ज़ेभै तम्हैं इधा का छ़ुटे, मेरै हस्तू बी पजैल़ै आप्पू संघा तिधी।

विश्वासा करै ई दैनी याकबै मरदी बारी युसुफे दूई शोहरू लै बर्गत. याकब फिरअ मांज़े शरैहणां बाखा उटअ संघा टेक्‍कअ माथअ।

इसहाक करा त परमेशरा दी विश्वास, तैही किई तेऊ परमेशरा का प्राथणां कि मेरै मरनै का बाद दैणीं आजू मेरै दुही शोहरू एसाब अर याकबा लै तैहा करारे बर्गत।