Popular Bible Verses from 1 करिन्थी 6

Share

तम्हां का आसा थोघ कि थारी देही आसा भबन ज़ेथ पबित्र आत्मां बस्सा ज़ुंण तम्हां लै परमेशरै आसा दैनी दी, थारअ मालक आसा परमेशर। किल्हैकि परमेशरै आसा तम्हां लै खास्सी किम्मत दैनी दी, ज़धू तेऊ मसीहा ईशू बल़ीदान हणां लै छ़ाडअ, तै बोला हुंह तम्हां लै कि ऐहा आपणीं देही करै रहैऊआ परमेशरो प्रतप्प।

तम्हां का आसा थोघ कि बूरै करनै आल़ै लोग निं परमेशरे राज़े बरासते हकदार बी हणैं आथी। तम्हैं निं इहै धोखै दी रही कि तम्हैं करा कदुष्ट काम अर तज़ी बी हणैं तम्हैं परमेशरे लोग! ज़ुंण ईंयां इहै लोग हणैं, ज़िहै कंज़री सेटा डेऊणैं आल़ै, मुहुर्ती पूज़णै आल़ै, कंज़रै, धोखै दैणैं आल़ै, मर्धे देही झ़ूरनै आल़ै, च़ोर, मांण करनै आल़ै, शराबी, गाल़ी दैणैं आल़ै, कदुष्ट कामां करनै आल़ै निं परमेशरे राज़ा दी बरासते हकदार हणैं आथी।

कंज़रैई करनै का रहा दूर! देही दी निं होर पाप तेतरअ असर करदै ज़ेतरअ अह पाप करा। कंज़रैई करनै आल़अ मणछ करा आपणीं देहीए खलाफ पाप।

तम्हां मांझ़ै सका कई इहअ बोली, “बधाने साबै सका हाम्हैं सोभै गल्‍ला करी किल्हैकि हाम्हैं आसा विश्वासी।” तै आसा ठीक, पर हुंह बोला तम्हां लै इहअ कि सोभै गल्‍ला निं फाईदे आथी। हुंबी सका बोली, “हुंह सका बधाने साबै सोभै गल्‍ला करी।” पर मुंह निं तिंयां करनी किल्हैकि हुंह निं च़ाहंदअ कि हुंह कोई बी गल्‍लो गलाम बणू।

पर म्हारी देही आसा किम्मती किल्हैकि परमेशरै किअ आपणीं शगती करै प्रभू मरी करै भिई ज़िऊंदअ, अर हाम्हैं बी करनै तेऊ ज़िऊंदै।