Popular Bible Verses from रोमियों 6

Share

कऊँकि पापो री मजदूरी तो मौत ए, पर परमेशरो रा बरदान आसा रे प्रभु यीशु मसीह रे अनन्त जीवन ए।

तेबे तुसा लोका पाँदे पापो रा कोई अक्क नि रणा। कऊँकि तुसे एबे बिधानो रे साअरे नि जिऊँदे बल्कि परमेशरो री कृपा रे सआरे जिओ ए।

इजी खे जेबे आसे बपतिस्मा लया तो आसे यीशु मसीह साथे मारे गये और गाड़े गये। ताकि जिंयाँ मसीह पिता परमेशरो री महिमा रे जरिए मरे रेया बीचा ते जिऊँदा कित्तेया, तिंयाँ ई आसे बी नये जीवनो री जी चाल चलिए।

और ना आपणे शरीरो रे अंगा खे अधर्मो रा अथियार ऊणे खे पापो खे सम्बाल़ो, पर आपणे आपू खे मरे रेया बीचा ते जी उठे रा जाणी की आपणी जिन्दगी परमेशरो गे सम्बाल़ो और आपणे शरीरो रे अंगा खे तर्मो रा अथियार ऊणे खे आपणी पूरी जिन्दगी परमेशरो गे सम्बाल़ी देओ।

आसे जाणूंए कि आसा रा पुराणा जीवन यीशु मसीह साथे क्रूसो पाँदे चढ़ाईता रा ताकि पापो रा शरीर बेकार ऊई जाओ और आसे आगे खे पापो रे दास नि रऊँ।

ईंयां ई तुसे बी आपणे आपू खे पापो खे मरे रा, पर परमेशरो री खातर यीशु मसीह रे जिऊँदा समजो।

परमेशर आपणी कृपा ते आसा रे पापो खे माफ करोआ। तो आसे क्या बोलूँ? क्या आसे पाप करदे रईए, ताकि कृपा बऊत ओ? कदी पनि, आसे जेबे पापो खे मरी गे तो आगो खे तिदे किंयाँ जीवन बिताईये?

तुसे जाणोए कि जेबे केसी री आज्ञा मानणे खे तुसे आपणे आपू खे देई देओए और तेसरी आज्ञा खे मानोए तेबे तुसे तेसरे गुलाम बणी जाओए। ये गुलामी चाए पापो री ओ जेतेरा नतीजा मौत ए, चाए परमेशरो री ओ जेतेरी आज्ञा मानणे रा नतीजा धार्मिकता ए।

पर परमेशरो रा धन्यवाद ओ कि तुसे जो पापो रे दास थे, एबे मनो ते तेस उपदेशो खे मानणे वाल़े ऊईगे, जेतेरे सखाए रे तुसे चले। परमेशरो रे जरिए पापो ते छुड़ाई की तर्मो रे दास ऊईगे।