Popular Bible Verses from Mateyo 6

Share

Pele amusaangune kuyandaula bwami bwakwe mucite ziluleme, ndindilyo, Leza nayoomupa zintu eezi zyoonse.

Nkaambo kaako mutalibiliki azyajuunza nkaambo bwajuunza mbwajuunza. Buzuba buli boonse bulijisi mapenzi aabo.

“Nkaambo kaako ndamwaambila kuti mutalibiliki azyabuumi bwanu, kuti muyoolya nzi naa kunywa naa kusama. Sena buumi tabuli bubotu kwiinda cilyo, awalo mubili tuuli mubotu kwiinda zyakusama?

Pele nywebo ciindi nomukomba, amunjile muŋanda yanu, mujale mulyango, mukombe kuli Uso Uutabonwi. Eelyo walo Uso uubona zyoonse zicitwa mumaseseke uyoomulumbula.

Pele mboobu mbomweelede kukomba: ‘Taateesu ooli kujulu, alilemekwe zina lyako. Abuboole bwami bwako, alucitwe luyando lwako ansi aano mbubonya mbuli mbolucitwa kujulu.

Utupe sunu zilyo nzyotubula.

Utulekelele milandu yesu, mbubonya mbuli mbotubalekelela aswebo balaamilandu kulindiswe.

Utatulekeli mukusunkwa, pele utuvune kumubi uulya. Nkaambo bwami mbubwako anguzu abulemu, kukabe kutamani. Ameni.’

“Nkaambo kuti naa mwalekelela bantu milandu yabo, awalo Uso uuli kujulu ulamulekela anywebo.

Amulange bayuni, tabasyangi, tabatebuli, nikuba kuyobola mumatala. Nikuba boobo Uso uuli kujulu ulabasanina. Sena nywebo tamuyandiki kwiinda mbabo?

“Mutanooliyobwedi lubono ansi aano, mapempya ankalaya mpozinyonyoona ababbi mpobadonkola kubba. Pele nywebo amuyobole lubono kujulu, ooko mapempya niiba nkalaya nkozitanyonyooni, ababbi nkobatadonkoli kuti babbe. Nkaambo ooko kuli lubono lwanu nkokunooli mizeezo yanu.

“Taakwe muntu uukonzya kubelekela bami bobilo, nkaambo ulasula umwi akuyanda umwi, naa ulakakatila kuluumwi akusampaula umwi. Tamukonzyi kubelekela Leza alimwi abuvubi pe.

Pele kuti naa Leza kasamika boobo bwizu bunga sunu mpobuli pele juunza bwapya, masimpe nywebo uyoomusamika kwiindilila. Lwaceya lusyomo ndomujisi!

Pele nywebo ciindi nimupa zipo zyaluzyalo, janza lyanu lya lumwensi litazibi lyalulyo ncolicita, kutegwa zipo zyanu zitabonwi abantu. Eelyo Uso uubonena kumbali uyoomulumbula caantangalala.

“Amucenjele kuti mutaciti milimo yanu iiluleme ku bantu mumambonwa, nkaambo mwacita boobo tamukwe bulumbu kuli Uso uuli kujulu.

“Nkabela ciindi ncomuliimya kulya, mutanooungumani mbuli basikuupaupa ameso. Nkaambo balasyulunganya masyu kutegwa kuliimya kwabo kubonwe abantu. Ncobeni ndamwaambila kuti balijisi kale bulumbu bwabo. Pele nywebo ciindi nomuliimya munanike mutwe akusamba kumeso, kutegwa kuliimya kwanu kutabonwi kubantu, pele kubonwe buyo kuli Uso uutabonwi. Walo Uso uubona zyoonse zicitwa kumbali uyoomulumbula caantangalala.