Popular Bible Verses from Lɛta Fɔ Rom 4

Share

Natin nɔ mek i dawt wetin Gɔd bin dɔn prɔmis am, i nɔ tap fɔ biliv, bifo dat di biliv we i biliv bin mek i gɛt pawa ɛn mek i prez Gɔd mɔ ɛn mɔ. Ebraam bin shɔ se Gɔd go ebul du wetin i bin dɔn prɔmis se in go du fɔ am.

Lɛkɛ aw dɛn rayt na Gɔd in Buk, we Gɔd se, “A dɔn mek yu bi papa fɔ plɛnti neshɔn.” So Gɔd insɛf, we Ebraam bin biliv, we prɔmis dis prɔmis, no se i go bi. Na di sem Gɔd de mek dɛn pipul we bin dɔn day gɛt layf bak, ɛn wɛn i tɔk dɛn tin we nɔ bin de na wɔl, go de.

Gɔd bin gri fɔ mek Jizɔs day fɔseka wi sin dɛn, ɛn i mek Jizɔs rayz frɔm di grev so dat i kin mek ɔltin rayt bitwin wi ɛn Gɔd.

Ebraam bin biliv ɛn abop se wetin Gɔd prɔmis, go bi, wɛn natin nɔ bin de fɔ abop pan, na dat mek i kam bi “Papa fɔ plɛnti neshɔn.” Jɛs lɛkɛ wetin rayt na Gɔd in Buk, we se, “Yu grampikin pikin dɛm go plɛnti.”

So na di biliv we Ebraam bin biliv Gɔd mek Gɔd gi am di tin we i bin dɔn prɔmis se in go gi am. Dat na fɔ sho wi se di tin we Gɔd prɔmis fɔ gi ɔl Ebraam in grampikin pikin dɛm na fri, ɛn nɔto fɔ dɛn wan nɔmɔ we de du wetin di Lɔ se, bɔt na fɔ dɛn wan sɛf we biliv Gɔd lɛkɛ aw Ebraam bin biliv am. Ebraam na di papa wɛn i kam pan Gɔd biznɛs fɔ wi ɔl we de na wɔl.

“Dɛn pipul we Gɔd dɔn padin dɛn sin, gɛt blɛsin, dɛn na pipul we Gɔd dɔn pul dɛn sin kɔmɔt na dɛn layf, i nɔ de mɛmba dɛn sin igen. Dɛn pipul we Gɔd luk se nɔ gɛt sin igen bikɔs i dɔn padin dɛn, gɛt blɛsin!”

Dɛn rayt na Gɔd in Buk se, “Ebraam biliv Gɔd ɛn bikɔs i biliv Gɔd, Gɔd luk se na pɔsin we de waka tret.”