Popular Bible Verses from Lɛta Fɔ Rom 14

Share

Wɛn pɔsin de tɔk bɔt di rul we Gɔd de rul, i nɔ de tɔk bɔt tin fɔ it ɛn tin fɔ drink, bɔt i de tɔk bɔt aw Gɔd de mek ɔltin rayt bitwin in ɛn mɔtalman, di kol at we Gɔd de gi, ɛn di gladi we Gɔd in Spirit de put na pɔsin in at. Ɛnibɔdi we de sav Krays lɛkɛ dis go mek Gɔd gladi ɛn i go mek mɔtalman sɛf lɛk wetin i de du.

Wɛn wi liv, wi liv fɔ di Masta; wɛn wi day, wi day fɔ di Masta. So, wɛda wi liv ɔ wɛda wi day, wi na di Masta yon.

So, wi fɔ tray ɔltɛm fɔ de du dɛn tin we go briŋ kol at, ɛn dɛn tin we go mek ɔda pipul ɛn wisɛf biliv Gɔd mɔ ɛn mɔ.

So wi fɔ lɛf fɔ jɔj wi kɔmpin, wi fɔ mekɔp nɔ fɔ du ɛnitin we go mek wi kɔmpin Kristiɛn sin.

Dɛn rayt na Gɔd in Buk se, “Di Masta se, wans nɔmɔ a gɛt layf, a prɔmis se ɔlman go nil dɔŋ bifo mi, ɛn ɔlman go tɔk ɔlɔbɔt se, mi na Gɔd.” So ɔlman go gɛt fɔ ansa fɔ insɛf to Gɔd fɔ wetin i du na wɔl.

Una fɔ trit di pɔsin we nɔ biliv gud yet lɛkɛ una brɔda, una nɔ fɔ agyu wit am bɔt wetin i tink se rayt fɔ du.

Udat na una fɔ jɔj ɔda pɔsin savant? Na di pɔsin we i de wok to fɔ tɛl am, if i du gud ɔ if i du bad. Di savant go ebul du wetin i fɔ du bikɔs Gɔd we na di Masta ebul fɔ mek i du wetin i fɔ du.