Popular Bible Verses from Iromayon 6

Share

Naarai eropit ka aronus erait atwanare. Konye idutat nika along'u nika Akuju erait akijar na emam esial kotoma Yesu Kristo Lokapolon wok.

Mam aronus kitemokina akipuga osi naarai mam osi kijaasi kwap ka ekisil konye ijaasi osi kwap ka asianut.

Kanuka ng'un apon konuka oni nepepe ka nesi na ebatisaere oni akibatisao naka akimor atwanare keng', tetere ibeikinete oni de ajaikin akijar nakitetet kwape kitajarunere Kristo kamaka lukatwak kapedor kanaka akibusesu naka Papa.

Kere de mam ajalakin alaro apede naka awate kus kitosoma aronus bala iboro luka arokusio. Konye, koinakisi Akuju awate kus kwape ka itung'a kalu ayaun toma akijar alomun kamaka lukatwak. Bobo kolemutu awate kus kamaka ka Akuju kitosomae bala iboro lu edolito.

Ijenete oni ebe apon kibubukine omusalaba ejautene wok lo mojong' nepepe ka Kristo tetere emudiaro akwan naka arokusio komam oni bobo kiraunete ijoloi luka arokusio.

Kanuka ng'un, ejii osi de akijene ebe itwakito osi ikamuuti asoma aronus, konye ijarete osi kotoma akimorikikina ka Akuju akitoro namaka Yesu Kristo.

Inyena konye itemarete oni? Ketolositete akiboi kotoma arokusio tetere iyatakin asianut ka Akuju? Mere kong'in! Itwakata oni ikamuut asoma aronus. Ikote konye oni lu ipotu kotwakata ikamuut asoma arokusio itolosoti akiboi karokusio ai?

Abeite ijenete osi ebe kilemunosi osi ikulopek bala ibulesun lu iyong'ara, iraito osi ibulesun ka ejakait kalo iyong'ito osi, atikere kerait loka aronus lo eyari itung'a atwanare, eyong'ite lo eyari itung'a toma adolite.

Konye keyalamikisi Akuju! Teni ace pak kiraito osi ibulesun luka aronus, konye iyong'ata osi kipokona kitawono kus kere abeite na edumun kotoma akisisianakino kana ipotu osi kidiautu. Apon kolakune osi kotoma aronus kosodete osi araun ibulesun luka adolite.