Popular Bible Verses from KŨGUŨRĨRIO 12

Share

Nao nĩmamũtoretie nĩ ũndũ wa thakame ya Gatũrũme, na nĩ ũndũ wa ciugo cia ũira wao, na nĩmaaregaga kwenda mĩoyo yao o na maatuĩka a gũkua.

Na nĩndaiguire mũgambo mũnene Igũrũ, ũkiuga atĩrĩ, Rĩu nĩ gũkinyu kĩhonokanio, na ũhoti, na ũthamaki wa Ngai witũ, o naguo wathani wa Kristo wake; amu-rĩ, mũcuki wa ariũ a Ithe witũ nĩarĩkĩtie kũharũrũkio, ũrĩa ũtũire amacukaga harĩ Ngai witũ mũthenya o na ũtukũ.

Nayo ndamathia ĩo nene ĩkĩharũrũkio, nĩyo nyamũ-ya-thĩ o ĩrĩa ya tene, na noyo ũrĩa wĩtagwo Mũcukani na agetwo Shaitani, ũrĩa ũhĩtithagia kĩrĩndĩ gĩa thĩ gĩothe; agĩkĩharũrũkio o thĩ, o nao araika ake makĩharũrũkanĩrio hamwe nake.

Hakĩrĩ ũguo-rĩ, gĩkenei, Igũrũ rĩrĩ, o na inyuĩ mũtũire kuo! Thĩ ĩĩ na haaro-ĩ, o narĩo iria rĩrĩa inene! amu inyuĩ-rĩ, mũcukani nĩamũikũrũkĩire e na marũrũ manene, tondũ nĩoĩ atĩ no ihinda inyinyi atigairie.

Na rĩrĩ, gũkĩgĩa mbaara Igũrũ, Mikaeli na araika ake magĩthiĩ kũrũa na ndamathia ĩo; ndamathia o nayo na araika ayo makĩrũa nao

Nayo ndamathia ĩkĩya kũrakarĩra mũndũ-wa-nja ũcio mũno, ĩgĩthiĩ kũrutĩra rũciaro rũake mbaara rũrĩa rũatigarĩte, arĩa-ni mamenyagĩrĩra maathani na Ngai, na magatũũra magwatĩirie ũira wa Jesu.

NINGĨ gũkĩoneka ũrirũ mũnene Igũrũ; na nĩ mũndũ-wa-nja wĩhumbĩte riũa, na akinyĩte mweri na magũrũ make, na akagĩa na thũmbĩ mũtwe ya njata ikũmi na igĩrĩ; na aarĩ na ihu, na nĩ gũkaya aakayaga akĩrũmagwo akĩrĩwo nĩ ruo rũa kwenda gũciara.

Nake agĩciara mwana wa kahĩĩ, ũrĩa ũkariyĩraga ndũrĩrĩ ciothe na rũthanju rũa kĩgera; na mwana ũcio wake akĩhurio na igũrũ agĩkinyio kwĩ Ngai, o gĩtĩ-inĩ gĩake gĩa ũthamaki. Nake mũndũ-wa-nja akĩũra agĩthiĩ werũ-inĩ kũndũ athondekeirũo handũ nĩ Ngai, atĩ onjoragĩrũo kuo matukũ ngiri ya magana merĩ ma mĩrongo ĩtandatũ.

Na gũgĩcoka gũkĩoneka ũrirũ ũngĩ igũrũ, na nĩ atĩrĩ, nĩ ndamathia nene, ndune mũno, ĩĩ na mĩtwe mũgwanja na hĩa ikũmi, na mĩtwe yayo igũrũ ĩkagĩa na managĩ mũgwanja ma ũnene. Nakĩo gĩthita kĩayo gĩakururĩtie njata cia igũrũ gĩcunjĩ gĩa ithatũ, gĩgĩcirekania thĩ. Nayo ndamathia ĩo ĩkĩrũgama mbere ya mũndũ-wa-nja ũcio wakiriĩ gũciara, nĩguo aaciara, ĩrĩe mwana wake.

Nake mũndũ-wa-nja akĩheo mathagu merĩ ma nderi ĩrĩa nene, nĩguo ombũke athiĩ werũ-inĩ akinye handũ hake, harĩa egũtũũra onjoragwo ihinda igima na mahinda merĩ na nuthu ya ihinda, atekuonwo nĩ nyamũ-ya-thĩ ĩo. Nayo nyamũ-ya-thĩ ĩkĩborora maĩ na kanua kayo o ta rũũĩ ĩkinyĩrie mũndũ-wa-nja ũcio, nĩguo ĩtũme atwarũo nĩ kĩguũ kĩu. Nayo thĩ ĩgĩteithia mũndũ-wa-nja, thĩ-rĩ, ĩgĩathamia kanua kayo, ĩkĩmeria rũũĩ rũu rũabororirũo nĩ ndamathia kanua kayo.