Popular Bible Verses from GŨCOKERITHIA MAATHANI 11

Share

Na mũmarutage ciana cianyu, na mwaragie ũhoro wamo hĩndĩ ĩrĩa ũikarĩte nyũmba yaku thĩinĩ, na hĩndĩ ĩrĩa ũgũthiĩ na njĩra, na hĩndĩ ĩrĩa ũkomete, o na rĩrĩa ũũkĩrĩte.

Tondũ ũcio mohoro macio makwa-rĩ, maigagei ngoro-inĩ cianyu, o na maroho-inĩ manyu; na mũmohagĩrĩre moko-inĩ manyu nĩguo matuĩkage kĩmenyithia marĩ ho, o na mũmekagĩre mathiithi manyu nĩguo matuĩkage kĩririkania gĩĩkĩrĩtwo gatagatĩ-inĩ ka maitho manyu.

Na nĩgũgakinya atĩrĩ, atĩ mũngĩrũmia na kĩyo mũno maathani makwa marĩa ngũmwatha ũmũthĩ, mwendage Jehova Ngai wanyu, na mũmũtungatagĩre na ngoro yanyu yothe, o na muoyo wanyu wothe-rĩ, nĩndĩrĩmũheaga mbura, nĩguo yurage bũrũri wanyu kĩmera kĩayo gĩakinya, o mbura ya mũringo o na ya gũkũria irio, nĩ getha ũhotage gũcokereria irio ciaku ũgaciita makũmbĩ, o na ndibei yaku, o na maguta maku.

Tondũ ũcio endaga Jehova Ngai waku, na ũmenyagĩrĩre maũndũ marĩa agwathĩte ma irĩra cia watho wake wa kũrũmĩrĩrũo, na matuĩro make ma cira, o na maathani make, hĩndĩ ciothe.

Atĩrĩrĩ, mũthenya ũyũ wa ũmũthĩ-rĩ, nĩ kũhe ngũmũhe ũhoro wa kĩrathimo, o na wa kĩrumi; kĩrathimo-rĩ, mũrĩrathimagwo hĩndĩ ĩrĩa mũiguĩte maathani ma Jehova, Ngai wanyu, o marĩa ngũmũtaara namo ngĩmwatha ũmũthĩ; nakĩo kĩrumi-rĩ, mũrĩrumagwo hĩndĩ ĩrĩa mwarega kũigua maathani ma Jehova Ngai wanyu, mũgatiga gũthiĩ na njĩra ĩrĩa ngũmwĩra ũmũthĩ mũthiage nayo, mũkarũmĩrĩra ngai ingĩ iria mũtoĩ ũhoro wacio.

Ningĩ ũmaandĩkage hingĩro-inĩ cia nyũmba yaku, na ihingo-inĩ ciaku; nĩ getha matukũ maku, o na matukũ ma ciana ciaku, makaingĩhio hĩndĩ ĩrĩa mũgatũũra bũrũri ũcio Jehova erĩire mathoguo na mwĩhĩtwa, o ihinda rĩrĩa rĩothe igũrũ matu-inĩ rĩgũtũũra rĩrĩ igũrũ rĩa gũkũ thĩ.

Wĩmenyagĩrĩrei mũno ngoro cianyu itikanaheneke, mũgarũrũke, mũtungatĩre ngai ingĩ, o na mũcituragĩrie ndu mũcihoe