Popular Bible Verses from Tshimuangi 10

Share

Maweja-Nangila kuambila Moshe ne: — Uye kudi mukalenga wa bena Ejipitu. Meme ke udi mumupe muoyi wa tshitunu, yeye ne balombodi ba mu bukalenga buende bua mmone mua kuenza bishima bionsu ebi mu ditunga diende. Nanku wewe Moshe neumone mua kumanyisha muanebe wa balume ne muikuluebe mundi mulembakaje bena Ejipitu, muenze bishima bionsu ebi mu ditunga diabu. Ke munudi mua kujadika ne: meme ndi Maweja-Nangila.

Maweja-Nangila kuambila Moshe ne: — Olola tshianza mulu, midima yenzeke mu ditunga dia Ejipitu, midima mikole mipite idi bantu bafuane kukuata mu bianza! Moshe kolola tshianza mulu, midima mikole kuenzeka mu ditunga dia Ejipitu matuku asatu. Matuku asatu awu, bena Ejipitu kabavua ne mushindu wa kuendakana, bualu kabavua mua kumona bantu nabu to. Kadi muaba uvua bena Izrayele basombele uvua butoke.

Moshe kuolola dikombu mu ditunga dia Ejipitu. Dituku adi too ne butuku, Maweja-Nangila kutuma lupepele lufumina kudi diba dipatukila. Butshia dinda, lupepele alu kupaluisha mpasu. Mpasu ayi ivua mipite bungi mu ditunga dijima dia Ejipitu, ikila miaba yonsu. Katshia mpasu kayivua mianji kumueneka bungi abu. Kabidi mikuabu kayena mua kumueneka kabidi bungi abu to.