Popular Bible Verses from Deuteronome 8

Share

Alakanya Jehova Nungungulu wa wena, hakuva hi yena a ku nyikileko ntamu a ku ti lavela tshomba, a kuva a tiyisa xivumelwano lexi a hlambanyileko ka vararu va wena, khwatsi hi lezi a mahako ni nyamutlha lezi.

I ku koramisile, i ku tsikile na u hi ni ndlala, i ku gisile manna, lawa u nga kala u nga ma tivi, lawa hambu vararu va wena na vona va wa nga ma tivi; aku kasi ku ku gonzisa lezaku a munhu a nga hanyi hi xibaba xoce, kanilezi hi timhaka tontlhelele ti humako nonwini wa Nungungulu.

Alakanya yontlhe ndlela leyi Jehova Nungungulu wa wena a ku fambisileko ha yona lomu xiwuleni lomu ka 40 wa malembe, aku kasi a ku koramisa ni ku ku ringa, kasi a fela ku tiva lezi zi nga lomu mbilwini ya wena; lezaku kutani u ta hlayisa milayo, kutani u nga yi hlayisi.

U nga wuli mbilwini ya wena ku ngalo: A ntamu wa mina ni canja ga mina ga ntamu gi nzi fumisile.

Ti wonele ku nga taku u rivala Jehova Nungungulu wa wena, u tsika ku hlayisa milayo yakwe ni timhaka takwe ni zileletelo zakwe, lezi nzi ku leletelako nyamutlha.

Vumela lomu mbilwini ya wena lezaku Jehova Nungungulu wa wena a ku laya, khwatsi hi munhu a layako nwanana wakwe.

Na wena u taga u kala u xura, u bonga Jehova Nungungulu wa wena hi kota ya tiko legi go saseka a ku nyikileko gona.

U ta hlayisa milayo ya Jehova Nungungulu wa wena, u famba hi tindlela takwe, ni ku mu chava.

loyi a nga ku gisa manna lomu xiwuleni, lawa ma nga tibyiwiko hi vararu va wena; lezaku a ku koramisa, ni ku ku ringa kasi hi magumeso wa fela ku ku mahela kusasa.

Ku nga taku laha u ta ngaga u xura, ni laha u ta nga aka a tiyindlu to saseka u tshama ka tona, ni laha tihomu ta wena ni timbuti ta wena zi ta nga anza, ni laha a siliva ya wena ni nzalama ya wena zi ta nga tala, ni laha a tshomba ya wena yi ta nga enzelekelana, a mbilu ya wena yi nga ti kukumukisi, u rivala Jehova Nungungulu wa wena, loyi a ku humesileko tikweni ga le Gipite, lomu ndlwini ya wukhumbi

Hakuva Jehova Nungungulu wa wena i ku heleketa ka tiko go saseka, a tiko ga micongo, ni ga tihlowo, ni ga mativa, ni ga zibuka, lezi a mati ya kona ma humako lomu minzhelelweni ni lomu zitsungeni; a tiko ga mavele, ni sevada, ni ga mavina, ni ga makuwu, ni ga mapomegranada; a tiko ga maoliva ni mafura ni wulombe; a tiko legi u ta ngaga zakuga za wena na u nga vileli nchumu, laho u to kala u nga vumali nchumu; a tiko lego a maribye ya kona ma nga ziketse, legi u to kela a suku lomu zitsungeni za gona.

Mu ta hlayisa milayo yontlhe leyi nzi mu leletelako nyamutlha, kasi mu fela ku hanya hi ku anza, mu enghena kuya fumela a tiko legi Jehova a hlambanyileko ka vararu va nwina.

A tinguwo ta wena a ti hlakalangi mirini wa wena, ni mikonzo ya wena a yi vimbangi lomu ka 40 wa malembe.

loyi a ku fambisileko xiwuleni xa hombe xo tshisa, lomu xikari ka tinyoka ta wuxungu ni tihume, ni lomu ka matshamu ma womileko, laho ku nga hi hava ni mati; yena a humesa mati hi lomu ribyeni