Popular Bible Verses from O ROMA 8

Share

Ngone hohiöriki ma Jou Madutu watatoro hagala o hali, hiädono mahasili maoa-oa la o nyawa iwïdora-dora Unanga deʼ wä aho-ahoko imadäene de to una Ai datoro.

Hababu ngohi duru tongaku o duniaka mata-mataika, kayaoa o honenge ikali o wowango, kayaoa o malaekatikaoli o popareta, kayaoa okia naga inahi bobodito örahanënanga de o öraha aha iböa-böa, ekola o kuata mahomoohi, kayaoa o hali okianaga o dihangoka, ikaoli o hali okianaga o dunia magoronaka ekola okia dika mahomoa, mata-mata ganga yakunua iwitatoko ma Jou Madutu wonä dora ngone, hokä wohidumutoka mangëkomo de madodagi de o Kristus Yesus tongone nanga Jou.

Hoko genangoli ma Jou Madutu ai Womaha yaino inäriwo ngone nako ngone hobole. Hababu ngone hohiorikua sarakia kokiani ngone homäniata; o Womaha gënanga mahirete wïhimanga ma Jou Madutu la igahoko mangale ngone de manahihu de manganono duru iluku hiädono yakunua ihidemo.

Okia yakunu hotemo örahananga mangale mata-mata gënanga? Nako ma Jou Madutu wonahiböa ngone, o nagona yakunu inalawani ngone?

Onanga yowöwango-wango yorimoi de o Kristus Yesus örahananga koiwaka o hukumanga onangika.

Nako o nyawa nanga biaha yakuaha anidibanga, done mabaha o honenge. Mä nako ma Jou Madutu ai Womaha yakuaha anidibanga, done mabaha o ngango deʼ o dame de ma Jou Madutu.

Kowali! Mata-mata gënanga magoronaka iholoi ngone hamäke o utumu i tötotomo mangale Unanga wonädora ngone!

Mata-mata o hangihara hatago-tagongo örahananga, imoteke ngohi ahidamäke, yakunua hakali-kali hohitero de o mulia aha ihinyata-nyata ngoneino.

Boteka naga yakunu iwitatoko o Kristus wonädora ngone? Yakunu o huha iwitatoko, ekola o hukaranga, ekola o aniaya, ekola o habirokata, ekola o mihikini, ekola o bahaya, ekola o honenge?

Done ma Jou Madutu, wohiori-oriki o nyawa nanga hininga madol̄a, womangarati o Womaha gënanga mamau; hababu o Womaha gënanga igahoko ma Jou Madutuika la ma Jou Madutu Ai umati, deʼ imadäene de ma Jou Madutu aimau.

O nyawa yätuda-tuda ma Jou Madutu ai Womaha ganga ma Jou Madutu aingoha-ngohaka.

O nyawa yowöwango-wango imoteke o nyawa nangabiaha, hoko genangika yapikiri okia yoigo-igo o nyawa mangabiaha. Mä hagala o nyawa yowango imoteke ma Jou Madutu ai Womaha, gila-gila yapikiri okia yoigo-igo ma Jou Madutu ai Womaha.

Ai ngohaka mahirete kowïhayangua, duga-duga wohidöaka mangale tongone mata-mata nanga paralu; de o nagona yato Unanga aha wonahidöakua ngoneino hagala moi-moi mahomoaohi?

Ma Jou Madutu ai Womaha imakomoteke de nanga womaha ihinyata ngone ganga ma Jou Madutu aingoha-ngohaka. Aa, nako ngone ganga Ai ngoha-ngohaka, done ngoneö ganga de nanga haku hatarima Ai puhaka kiaka aha hatarima o barakati wasösadiaka ma Jou Madutu mangale Ai ngoha-ngohaka. Ngone aha hatarima homako moteke de o Kristus okia ma Jou Madutu wasösadiaka mangale Unanga; hababu nako ngone hatagongo o hangihara de o Kristus, ngoneö aha inahimulia de o Kristus.

O nyawa manga dibanga yakokuaha o nyawa nangabiaha o nyawa geönanga imateke haturü de ma Jou Madutu; karana o nyawa geönanga imahimotekua ma Jou Madutu aititaika; deʼ i goungu ünanga wakunua wamoteke ma Jou Madutu aitita.

O alami mata-mataika yönahihu de yönganono itamä maöraha ma Jou Madutu wahinyata Ai ngoha-ngohaka.

Ngone hohiöriki hiädono o örahanënanga o alami mata-mataika itaiana karana yatagongo o huha de o hangihara hokä o ayo momatëngo mohangihara maöraha amingohaka imakil̄au.