Popular Bible Verses from Roma 5

Share

Mada'a Ma Jou'ongu Madutu masiretene 'a sijumu 'Ai dadalara madutu ra ngene so'o ne: Wakutu ngene wo 'ahu toma ḏosa moju, Kristus 'o sengene di'a ngene!

Reo ngo-nganono ma duhu so'o gena-ge, ḏuanga i'a nanga 'akala re sinyingara 'i rapo'o ua, sababu Ma Jou'ongu Madutu 'o sitotomo 'Ai jaji ra ngene. Ngene rewo waro gena-ge sababu Ma Ngagara 'Ofi-'Ofi ga'a Unanga ro pula'a ra ngene, Enanga 'i siromanga nanga 'akala re sinyingara Rai dadalara.

So'o gena-ge ḏi'i, ngene wo maroanga na'o wo sanga susa re sangisara, sababu ngene wa waro mangale susa re sangisara gena-ge 'i riono ngene di'a wo tahana renanga 'akala ḇanyo. Re na'o ngene wo tahana ma tero gena-ge Ma Jou'ongu Madutu 'o 'akoru ngene nanga de'oso re ḏegoro. Sidogo ḏi'i, ngene nanga ngo-nganono ganapu te'e ra Unanga, sababu ngene wo waro Unanga na 'akoru.

Sababu gena-ge, nange-ne ngene wo 'ahu dame ra Ma Jou'ongu Madutu sababu 'oru ga'a nanga Jou Yesus Kristus ra 'a'a di'a ngene. Gena-ge 'i dadi sababu ngene nanga ngo-ngaku ra Yesus Kristus, dadi ngene rewo dadi ngowa'a kamanga sala ua Tai momina. Re ḏi'i, sababu ngene rewo ngaku Yesus Kristus, ngene wo basono Ma Jou'ongu Madutu 'ai mura re dadalara tananga 'ahu tau-taunu sababu 'oru ga'a Yesus Kristus ro 'a'a di'a ngene. Re ngene wo maroanga, sababu ngene renanga ngo-nganono 'i te'e mangale ḏuanga i'a ngene wo sanga balangu ra Ma Jou'ongu Madutu 'ai mulia.

Toma 'orasa ga'a Ma Jou'ongu Madutu ra sitantukanga pasala ḏua, wakutu ngene nga'unu wo sisalamata ua ngene masiretene, Kristus 'o sengene di'a ngene ga'a wo kiḏanga ra Ma Jou'ongu Madutu.

Sababu gena-ge, toma 'orasa nange-ne ngene rewo dadi ngowa'a kamanga sala ua ra Ma Jou'ongu Madutu 'ai momina, sababu Kristus 'ai ngaunu wakutu Unanga 'o sengene di'a ngene. Re tantu ḏua, Kristus ḏuanga i'a 'o sisalamata ngene ra Ma Jou'ongu Madutu 'ai borata wakutu Unanga 'o sihukumu dungia nena-ne.

Re ma tero sa'olo ngowa'a repe 'aḏi dadi ngowa'a baraḏosa sababu matengo i'a 'o mete'e ua Ma Jou'ongu Madutu, so'o gena ḏi'i ngowa'a repe 'aḏi dadi ngowa'a loasa re banari ra Ma Jou'ongu Madutu 'ai momina sababu matengo i'a 'o mete'e Ma Jou'ongu Madutu.

Re sidogo ḏi'i, ngene wo maroanga mangale ngene rewo marimoi ra Ma Jou'ongu Madutu sababu nanga Jou Yesus Kristus ga'a ro sirimoi ngene ra Ma Jou'ongu Madutu.