Popular Bible Verses from Roma 1

Share

Sababu ngoi to ngaku ti-tiai toma Habari Roanga ga'a kuasa ra Ma Jou'ongu Madutu tala di'a sisalamata ngowa'a ga'a raḏi ngaku mo-moini: Siḏa-siḏa ngowa'a Yahudi, kara nange-ne ngowa'a Yahudi ua ḏi'i.

Sababu reo Habari Roanga gena-ge, Ma Jou'ongu Madutu 'o sijumu ma ngo'omo mangale ngowa'a nyengara 'aḏi dadi ngowa'a loasa re banari ra Ma Jou'ongu Madutu 'Ai momina. Pa'i gena-ge 'i dadi ḇato, sababu ngowa'a matengo 'o ngaku Ma Jou'ongu Madutu; ngo'omo lelegu 'i cua! Gena-ge ma tero sa'olo ri silefo toma Boku 'Ofi-'Ofi so'o ne: “Ngowa'a ga'a loasa re banari ra Ma Jou'ongu Madutu 'ai momina sababu manga ngo-ngaku ḇato, ananga gena-ge ḏuanga i'a 'aḏi 'ahu kasingado-ngadolo i'a.”

Sababu toma 'orasa Ma Jou'ongu Madutu 'o sidadi dungia, manusia nyengara 'aḏi sahe mangale Unanga 'ai kuasa kama ḏo-ḏogumu ua, re Unanga mode-mode'e Ma Jou'ongu Madutu. Kalaha manusia 'aḏi oḏi'i yoḏu'u Unanga mada'a manusia nyengara 'aḏi waro 'Ai tabeata sababu 'oru ga'a Unanga ra sidadi ḏua. Sababu gena-ge, manusia manga 'alasana 'i cua di'a 'aḏi waro ua mangale Ma Jou'ongu Madutu rema enanga.

Kalaha manusia 'aḏi waro mangale Ma Jou'ongu Madutu rema enanga, ananga 'aḏi silamo'o ua Unanga sa'olo Ma Jou'ongu Madutu re 'aḏi sibere ie murasa ma la ua ra Unanga ḏi'i. Siḏibo ḏi'i, manusia manga fikirana 'i dadi ma faeda 'i cua, re manga 'akala re sinyingara ri dadi hafu-hafu.

Ananga gena-ge 'aḏi dawongo ua do-doto'o banari mangale Ma Jou'ongu Madutu, mada'a 'aḏi ngaku do-doto'o banari ua; dadi ananga 'aḏi silamo'o re siḏubuso re 'aḏi de-de'oso Ma Jou'ongu Madutu 'ai do-dadi. Mada'a Unanga gena-ge, 'O do-dadi ma cimi, ananga ya silamo'o re siḏubuso ua re ya de-de'oso ua! Unanga gena-ge ga'a 'o patasa di'a sanga puji re silamo'o kasingado-ngadolo i'a. 'Amin.

Sababu Ma Jou'ongu Madutu ga'a 'o tegoro toma soroga, Unanga gena-ge ro sijumu 'Ai borata sababu manusia manga ḏosa. Dadi Unanga ḏuanga i'a 'O sijuruhakimi re 'O sihukumu ngowa'a mo-moini ga'a 'a'a ḏosa re kajahatana. Ngowa'a gena-ge ga'a manga kajahatana 'i dola'aku ngowa'a lelegu 'aḏi ngaku Ma Jou'ongu Madutu 'ai ba-banari.

Sababu manusia manga ga'a so'o gena, Ma Jou'ongu Madutu 'o sieanga i'a ananga di'a mete'e manga nyafusu ma jira. Dadi we-were'a manga 'akala ma nyafusu riwara toma na-nau'u sa'olo biasa di'a manusia, mada'a manga 'akala ma nyafusu toma we-were'a lelegu. So'o gena ḏi'i, na-nau'u manga 'akala ma nyafusu riwara toma we-were'a sa'olo biasa di'a manusia. Mada'a ananga gena-ge manga 'akala ma nyafusu pa'i toma na-nau'u lelegu ḇato. Na-nau'u 'aḏi madaga'a 'ori i'a reo na-nau'u lelegu ga'a 'i pula'a mara'a ananga, singadolo 'aḏi sanga enanga ma balasa mete'e manga ga'a ma jira. Sidogo ḏi'i, sababu ananga 'aḏi basono tala paralu riwara nana'o Ma Jou'ongu Madutu, Unanga 'o sieanga i'a ananga manga fikirana 'i dadi cira, singadolo ananga 'aḏi madaga'a 'ori i'a ga'a si'a'a yoḏu'u.

Kalaha ananga gena-ge 'aḏi magoro ino 'aḏi pahe, momongolo ua 'aḏi haga! Ananga 'aḏi oḏu'u silamo'o re siḏubuso Ma Jou'ongu Madutu ga'a 'ahu kasingado-ngadolo i'a. Siḏibo ḏi'i ananga gena-ge 'aḏi silamo'o re siḏubuso jou'ongu ma somoara ga'a 'i matuhu sa'olo manusia ga'a 'i sengene nyengara, re 'aḏi silamo'o re siḏubuso jou'ongu ma somoara ga'a 'i matuhu sa'olo namo toma diwanga, haiwani ma rou rata, re haiwani tare-tare toma tana'a ma re'u.