Popular Bible Verses from Ãẽ̱xgacügü ga guxchaxü̃güarü mexẽxẽruü̃gü 7

Share

Rü Tupana rü Yedeóü̃xü̃ ñanagürü: —Ngẽma duü̃xü̃gü i nua cugagüxü̃ rü namuxũchi nax ngẽma Madiáü̃tanüxü̃maxã pegü pedaixü̃. Erü nüma i ngẽma Iraétanüxü̃ rü chope̱xewa tá nügü nicua̱xüü̃gü nax noxrütama poramaxã nügü ínanguxü̃xẽẽxü̃ i Madiáü̃tanüxü̃me̱xẽwa.

Rü yexguma ga nüma ga Cori ya Tupana rü Yedeóü̃xü̃ ñanagürü: —Ñaa 300 i yatügümaxã tá pexü̃ íchanguxü̃xẽxẽ, rü tá nüxü̃ charüporamae i ngẽma Madiáü̃tanüxü̃. Rü guxü̃ma i ngẽma togü i curü duü̃xü̃gü rü marü name i napataca̱x nawoegu —ñanagürü.

¡Rü ngẽmaca̱x namaxã nüxü̃ ixu i ngẽma duü̃xü̃gü rü texé yamuü̃xe rü tümachiü̃ca̱x tawoegu! —ñanagürü ga Tupana. Rü yexguma nüma ga Yedeóü̃ rü yema duü̃xü̃gümaxã nüxü̃ nixu. Rü 22,000 nachiü̃ca̱x nawoegu, rü 10,000 yéma nayaxüãchi.

Natürü nüma ga Cori ya Tupana rü wenaxarü Yedeóü̃maxã nüxü̃ nixu rü ñanagürü: —Namuxũchiamatama. ¡Ẽcü dexáarü axwa nagagü! Rü ngéma tá cumaxã nüxü̃ chixu i ngexü̃rüüxü̃ tá nixĩ i cuwe rüxĩxü̃, rü ngexü̃rüüxü̃ tá nixĩ i napataca̱x cumuegutanüxü̃ —ñanagürü.

Rü nüma ga Yedeóü̃ rü dexáarü axwa nanagagü ga yema duü̃xü̃gü. Rü nüma ga Cori ya Tupana rü Yedeóü̃xü̃ ñanagürü: —Ngẽma duü̃xü̃gü i naxme̱xwa axegüxü̃ ñoma airugü nade̱xexcuxü̃chiüxü̃rüxü̃ rü chanaxwa̱xe i nüxrüguma cunachigüxẽxẽ nüxna i ngẽma duü̃xü̃gü i caxgüã́püxacü axegüxü̃ —ñanagürü. Rü yema naxme̱xwa axegüxü̃ ñoma airugü nade̱xexcuxü̃chiüxü̃rüxü̃ rü 300 nixĩ. Rü guxü̃ma ga yema togü rü caxgüã́püxacü naxaxegü.