Popular Bible Verses from ROMA 6

Share

Sebab upeak duso adeba maut; tapi karunio Allah adeba idup de kekal lem Kristus Yesus, Tuhan ite.

Sebab ko coa bakea kenuaso duso igai, kerno udi coa ade neak beak hukum agamo Yahudi, tapi neak beak kasih karunio.

Ngen awei o ite bi kenubua besamo-samo Si ngen baptisan lem kematian, supayo, serai awei Kristus bi nidup igai kunei antaro tun matei ngen kemuliaan Bapa, awei o kulo ite bakea idup lem idup de blau.

Ngen jibeakba udi semreak anggota-anggota awoknu ngen duso utuk nakei sebagai senatai kelaliman, tapi senreakba dirainu ngen Allah sebagai tun-tun, de bel'o matei, tapi de uyo idup. Ngen senreakba anggota-anggota awoknu ngen Allah utuk jijai senatai-senatai kebenaran.

Kerno ite namen, manusio an ite bi senalib kulo, supayo awok duso ite nyep kuasone, kunyau ite coa tunduk igai ngen duso.

Awei'oba lokne udi kemliakne: bahwo udi bi matei utuk duso, tapi udi idup utuk Allah lem Kristus Yesus.

Amen awei o, jano de lok ite madeak? Jano buliak ite bogoa menea duso, supayo tambeak kasih karunia o? Coa samo sekilai! Ite bi matei neak lem duso, awei ipe ite masiak dapet idup neak lemne?

Jano udi coa namen, bahwo amen udi semreak dirainu ngen suang tun sebagai hamba utuk tunduk ngen si, udi adeba hamba tun o, de harus udi tunduk, baik lem duso de mipin udi ngen kematian, atau lem ketaatan de mipin udi ngen kebenaran?

Tapi mucep syukurba ngen Allah! Bel'o memang udi hamba duso, tapi uyo udi ngen segenep atei bi tunduk ngen ajaran de sudo tenrus ngen udi. Udi bi bebas kunei duso ngen ijai hamba kebenaran.