Popular Bible Verses from 1 PETRUS 1

Share

Maroba ite bersyukur ngen Allah, Bapa Tuhan ite Yesus Kristus! Si kembiak mengasihi ite, do'o sebabne Si melei ngen ite idup de belau, midup igai Yesus Kristus kunei matei. Dio melei ite harapan de kuet. Ite maʼep utuk temuan berkat-berkat de seniap Allah utuk umat-Ne, adeba berkat-berkat de naik-Ne neak surgo, sehinggo coa dapet usak, jijai usuk atau luntur.

Kerno o lokba udi riang atei, kunyau uyo utuk sementaro waktau udi harus jijai ibo kerno udi meding memecem cobaan. Tujuanne adeba utuk melei bukti jano udi sungguak-sungguak pecayo ngen Tuhan jano coa. Mas de dapet usak kulo, ntes ngen opoi. Nah, imen udi adeba lebiak bego kunei mas, jijai harus ntes kulo supayo jijai murni. Ngen awei o udi bakea nujai ngen hormat serto nelkat pado bilai Yesus Kristus teko igai.

Sebelekne, lokba udi sucai lem kute sesuaktau de udi nea, serai awei Allah de menok udi o sucai. Lem Kiteb Sucai tetulis, “Lokba udi sucai, sebab Uku sucai.”

Taatba ngen Allah, jibeakba idup temurut keloknu de bel'o, pado waktau udi masiak ati kemnal Allah.

Sebab o lokba udi siap. Teateiba ngen maʼepba sepenuakne pado berkat de bakea nelei ngen udi pado waktau Yesus Kristus teko igai.

Lem Kiteb Sucai tetulis awei yo, “Kute umat manusio awei dukut, ngen kute kebesaranne awei bungai dukut. Dukut lew, bungaine kulo gugua; tapi firman Tuhan tep utuk selamo-lamone.” Firman o Bito Baik de sudo nelei namen ngen udi.