Popular Bible Verses from Pangila 14

Share

Oti toe mpo'epe-a libu' ngkai suruga to mpo'uli': ”Uki'-mi tohe'i: Ntepu'u ngkai wae lau, marasi'-ra tauna to mate to mepangala' hi Pue'.” Natompoi' Inoha' Tomoroli': ”Bate makono lia tetu-e! Apa' mento'o-ramo ngkai powewa-ra, pai' bate mporata-ramo mpai' wua' bago-ra.”

Toe-mi pai' topetuku' Alata'ala kana ntaha hi rala kasusaa', tida mpotuku' hawa' Alata'ala, pai' tida mepangala' hi Yesus.

Napasimuku mekio' mpo'uli': ”Mengkoru-mokoi hi Alata'ala, une'-mi kabohe tuwu'-na. Apa' rata-mi tempo pehukua'-na. Mepue'-mokoi hi Alata'ala to mpajadi' langi', dunia', tahi' pai' hawe'ea ulu ue.”

Oti toe, mala'eka katolu-na metuku' wo'o-imi-hawo mpotuku' mala'eka to rodua toera, pai'-i mekio' mpesukui mpo'uli': ”Hema–hema to mpopue' binata to dada'a tetui pai' pinotau-na, pai' hema–hema to mpotarima tanda binata toe hi wingke-ra ba hi pale-ra, tauna toera mpai' napewuku Alata'ala mpo'inu ininu to mopai' loki, uma ria hangkedia' galo-na. Batua-na, nakaroe mperegea-ra, uma ria ka'olu–olu-na. Tauna toera rasesa' hi rala apu pai' rea' apu, mala'eka–mala'eka to moroli' hante Ana' Bima to hi suruga mpopanto' karasesa'-ra toe. Rangahu ngkai apu to mposesa'-ra toe ulo' duu' kahae–hae-na. Hi eo-na hi bengi-na uma ria pento'oa-ra rasesa', apa' mepue'-ra-rana hi binata to dada'a toei hante pinotau-na, pai' ratarima-rana tanda hanga' binata toei.”

Oti toe, pehilo wo'o-ama mpohilo Ana' Bima toei mokore hi lolo Bulu' Sion. Dohe-na ria topetuku'-na to ha'atu opo' mpulu' opo' ncobu, hi wingke-ra te'uki' hanga' Ana' Bima pai' hanga' Tuama-na.

Pai' kuhilo wo'o hadua mala'eka ntani'-na ngkalimoko hi lolo raoa. Mala'eka toei mpokeni Kareba Lompe' to uma ria kabali'-na duu' kahae–hae-na, napalele hi manusia' to mo'oha' hi dunia', hi butu negara, butu pomuli pai' butu nyala basa.

Ngkai ree, ria mala'eka karodua-na mpotuku' mala'eka to lomo'-na, na'uli': ”Mokero! Mokero-mi ngata Babel to bohe lia! To Babel toera mpobawai manusia' humalili' dunia' mpo'inu ininu to melanguhi. Batua-na, to Babel mpobawai tau ntani'-na mpotuku' gau'-ra to uma tumotoa.”