Popular Bible Verses from ROMA 12

Share

Ela manumon ampin kare hadat oloh kalunen toh. Keleh Hatalla manguan keton manjadi oloh taheta, mangat keton hobah. Awi kalote keton olih mangatawan kahandak Hatalla – iete taloh je bahalap tuntang je manyanang ateie tuntang je tinduh-barasih.

Pahari handiai! Hatalla paham bahalap dengan itah. Jete sababe aku balaku nyame-nyame mangat keton manyarah arep keton kilau parapah je belom baya akan Hatalla bewei tuntang je manyanang ateie. Gawin sombayangm akan Hatalla puna patut kilau te.

Keleh pahari barakaharap dengan Tuhan tuntang hanjak, keleh sabar huang kasusah, tuntang baketep huang lakudoa.

Ela manalua arep keton impakalah awi taloh papa, tapi keleh pahari mampakalah kapapa mahapan kahalap.

Keleh kare pahari hasinta sama arep hapan kaheret atei sama kilau oloh hampahari hong ije kahuma, tuntang keleh keton hasanselo mahormat sama arep keton.

Keleh masi oloh dengan katoton atei. Keleh manyingi taloh papa, tuntang keleh mimbing taloh je bahalap.

Bara hila keton, keleh manggau jalan saoli-olih uka belom damai dengan oloh samandiai.

Pahari handiai! Ela samasinde mambaleh kasingin atei, nauhe Hatalla ih je mahukum. Basa huang Surat Barasih aton tarasurat, “Aku toh je mambaleh. Aku toh je mahukum, koan Tuhan.”

Keleh bagawi hapan kahias. Ela bakulas. Keleh bagawi akan Tuhan hapan karajin bara Roh Hatalla.

Hatalla jari manenga asi akangku. Jete bukue aku manasehat kare Pahari handiai: Ela mangkeme arep labih gantong bara je kapunae. Keleh keton manilai ampin arep keton hapan karandah atei; genep biti manilai arepe manumon kaolihe je inenga Hatalla akae awi ie percaya dengan Yesus.

Amon oloh papa gawie dengan keton, ela mambaleh hapan kapapa. Lalus taloh je bahalap hong tampayah oloh handiai.

Keleh belom rukun sama arep keton. Ela mamparahan ampin kagantong atei, tapi keleh manyama arep keton dengan oloh je randah pondoke. Ela maanggap arep labih pintar bara je kapunae.

Amon musoh keton balau, keleh manenga akae panginan; tuntang amon ie teah belaie, tenga akae danum ihop. Basa awi gawin keton kalote, keton tau mawi ie paham mahamen.

Keleh balaku dengan Hatalla uka ie mamberkat kare oloh je tulas dengan keton. Iyoh, keleh balaku Hatalla mamberkat ewen, ela manyapa. Keleh hanjak dengan kare oloh je hanjak, tuntang manangis dengan ewen je manangis.

Keleh mandohop kare oloh Kristen je beken sampai sukup kaperluae tuntang keleh manarima kare pahari je sama huang kapercaya, tarima ewen intu human keton dengan sanang atei aloh pahari dia kasene ewen.

Bitin itah toh aton are bagiae. Genep bagian aton gawin ayue kabuat-kabuat. Kalote kea dengan itah. Aloh itah handiai toh are, tapi itah toh kilau ije biti awi itah ije huang Kristus. Tuntang genep bitin itah hinje dengan sama arep itah kilau kare bagian bara ije biti.