Popular Bible Verses from OROMA 1

Share

Aid wene iri-ge Mbal Pem Nagawan-nen idnak amawi me, ebem inndi angin tubu yidnak nap oboksa inmiri yoso-o. Nandug-er-e Yawuri nap, imbirig-e, enlem nin nap na inmiri yoso ala karuk, an-e aid wene na bem-e ninnggiri mondok kasu bug-o.

Aid wene na-nen-e Mbal Pem Nagawan-nen at ondomok imin ap mot tak onposo wene iri nam tak pij-o. Mot tak onposolar-e, it inndi angin tubu yidnak kuri-net woroksiyem-e inndi angin tubu yidnak pem nak wolma nab-e Mbal Pem Nagawan engga mbarak pem-nen yosolar-e: ”Inndi angin tubu yidnak pem Mbal Pem Nagawan-nen lud tak nak inpidnak nab-e unlug-et wolma-o” luk yid iri nggal-nen yusu-o.

Mbal Pem Nagawan-nen nggweyak yu ndak wirid kuri-nen yawo kuri-ge Mbal Pem Nagawan abage kagwi buk abage iri-ge at woralik nalik yoso amawi min abage Mbal Pem Nagawan woraso min iri-ge ab-e nam-et kagolar-e, at-nen ndak worak pidnak tengge bem-nen ap-nen-e at yenggerak kali me-ge, it innggiri worosola, it-nen-e onggo yurag-e meya-o.

Ab-e Mbal Pem Nagawan enaru woragolar-et nde, ar-e Mbal Pem Nagawan-net yusu-o luk at kek tak ibigit lak, wa na yak tigit lak yiga-o. Are, it yebet kagwi indi na ebe lak mende kwat yosolat, it inndi-ge ndamuk yij-o.

It iri-nen-e lud tak nak kwaroso Mbal Pem Nagawan na keya buruk, ondolma-ge enesiget wene pogolat, Ndak Woroso Nap erembel wanurak na keya buruk ondolma-ge at-nen ndak worak pidnak tengge erembel wanogolat yiga-o. Ndemerer-e Ndak Woroso Nap nak erembel wanogolat woralik nalik momtak na-t nde-o. Amen.

Ap-nen meya yidnak iri-nen ndowaga Mbal Pem Nagawan enaru yurak iri kabak tak pusu bem-e Mbal Pem Nagawan isilepma-ge aid arem-nen ap-nen wene kuruk tugwi min meya kwarugwi min oboksa ebem nam tak pusu-o.

Iri kwarugwi ala karuk, it enaboro nak-nen ukwe ukwe yugwi mende irit kwarogolat wolmakluk, Mbal Pem Nagawan-nen-e it keya inpij-o. Nde, kwami-nen na irit, ap-nen ye unpugwi na keya buruk, it kwami nak kwami nak yebogolat woraiga-o. Nde, ap-nen na irit, kwami ye unpugwi na keya buruk, it na it-net ukwe ukwe luk, innggiri lag-et ap nak ap nak yebogolat woraidnak pem-e onggo-ge angin worak mende enpem mbosolat woragaij-o. Ab-e Mbal Pem Nagawan enaru yurag-e insili rak puruk keya bogola-ge, it inndi-ge meya nak peragolat, kwarugwi buk mende kwat tenak woragolat makluk-nen Mbal Pem Nagawan-nen-e keya inpij-o.

Nir-e ninndi-ge anggat ponok tag-o luk perali-t nde, wid inndi nde worali-o. Iri yili nap-nen-e kek tak woralik nalik woraso Mbal Pem Nagawan na ondolma lak yoso mende amorok ndak worogolar-e, ap ut mimirik min towe ut mimirik min wam ut mimirik min keyok keyok noso mende ut mimirik min ndak wiriga-o.