Popular Bible Verses from YESAYA 11

Share

Kawasa i TUHAN in mokapit kon inia, mopobaḻí kon inia mopia bo mobijaksana, mopandoi monimpod kon tosingogon bo mopoaid intua; monotaau kon ibog i Allah bo mopirisaya kon i-Nia. Koibognea in motoindudui kon i TUHAN. Sia in diábí monisig tongá indoian mako natua andeka podoyon kon singog in intau.

Buí i Datu Daud naonda bo pangkoi in kayu inta ain pinupuḷ. Táe ná doman onda nongkon tuodnea nomuká in poḻimping mobagu, natua doman nongkon buí i Daud in moiangoi in datu tobatú.

Intau bogá ihakimnea kinoadil, intau inta diá kodaya dinuḷuannea takin gina motuḻid; intau kotaḷá ihukum podudui in parentanea, intau moraat iyompatnea.

Sia in mogaid pongin moadil bo motoindudui kon bayongan yagi-yagi.

Kon Sion, Buḷud Motusi i Allah, diábí in moraat andeka momoguyaat. Dunia naa in mopuḻingbí in sinotaau soaḷ ki Allah, naonda bo tubig momuḻing kon dagat.

Ungkú in kayuon in mogutundon moyotakin in domba, macan tutul mosiug kon diug in bembé. Ki adí in sapi in moranut kon bonok moyotakin in singa, bo mongoadí in modia kon i monia.

Moiangoibí in wakutunea datu tobatú buí i Daud in tantú tontongan in bangusa mita. Mosia in mamangoibí kon inia, bo pogogutunannea in tango-tangoionbí.