Popular Bible Verses from EFESUS 5

Share

Ikau ana'-ana'Na ngasengko Allata'ala, sannaka Nakarimangnginna; lanri kammana, paralluko mannuruki ri Allata'ala. Paralluko attallasa' lalang ri pangngamaseanga, sangkamma todong Almasi mangngamaseangi mae ri katte. Nakoro'bangkangi KalenNa untu' ikatte, a'jari passare siagang koro'bang mabau', Nakarannuanga atinNa Allata'ala.

Lanri kammana, parhatikangi baji'-baji', antekamma katallassannu. Teako attallasaki sangkamma tau dongoka. Attallasakko sangkamma tau cara'de'. Pake bajiki sikontu kasampatang niaka ri kau; nasaba' anne jammanga, jammang kaja'dallang.

Teako nabengoi anggoro', nasaba' anjo anggoroka akkulleko napanraki. Passangalinna paralluko nikoasai ri RohNa Allata'ala. Pakei kana-kana mappakala'birika, kelong pammuji-mujia siagang lagu-lagu rohania lalang ri kana-kanannu. Paralluko rannu pa'mai' akkelong mammuji-muji mae ri Batara makoasaya. Lalang ri apa-apa mamo, paralluko tuli appala' sukkuru' mae ri Allata'ala Manggea, lalang arenNa Isa Almasi, Batarata.

Teako dongoki, mingka pappilajari apa Nakaerokia Batara.

Ikau tubura'-bura'nea, karimangngi bainennu, sangkamma Almasi Nakarimangngi jama'aka. Siagang Nakoro'bangkangi KalenNa untu' anjo jama'aka.

Ikau riolo niakko lalang ri sassanga. Kamma-kamma anne a'jari mako umma'Na Batara; jari nia' mako lalang ri singaraka. Lanri kammana, musti attallasakko lalang singaraka.

Paralluko sipilangngeri sollanna nupakala'biri' Almasi.

Ikau tu bai'-bainea, paralluko tundu' mae ri bura'nennu, sangkamma tundu' mae ri Batara makoasaya.

Mingka anjo ayaka nia' todong passisambunganna siagang kalennu: Sikontu tu bura'nea parallui nakarimangngi tubainenna, sanrapang anjo bainenna batangkalenna tonji; kammayatompa sikontu bainea musti napakalompoi tu bura'nenna.

Nia' tattulisi' lalang ri Kittaka angkanaya, “Lanri kammanami anjo nalanabokoi anrong-manggena bura'nea, nampa a'jari se're siagang bainenna, nanjari se'remo anjo tau ruaya.”

Teako katuru'-turukangi ri taua anggaukangi gau'-gau' tenaya matu-matunna nagaukanga tau ammantanga lalang ri kasassanganga. Passangalinna parallui nusolarri gau'-gau' kammaya anjo. (