Popular Bible Verses from TITUS 1

Share

Aha notatae, tukoonyo aha monsumbu' nu Tumpu, padahan palabuatan nu aha madi' totu'u. Aha monsaduakon da mongkahumimi'i ka' madi' mongka'oho' tulu-tulutan; aha aijo'mo na to mia-mian anu madi' moko ala mombau apa-apaa na anu ma'ima'.

Iwi-iwi na apaa susi' kona hi to mia-mian anu susi'. Panyo kona hi to mia-mian anu pikilannyo mahenyu ka' anu madi' palesaya, madi' hondo-hondo ko anu susi', kalana pikilan ka' kinyonyoa nu aha nahenyumo!

Ia tionyo montoongi hoso-hoson pangajalan anu timbali opalesaya, sumo anu ingajanakonmo hi ia. Tiba jalan anu sumo aijo' ia moko ala mompokinde'i mian kalana montoongi pangajalan anu totu'u, ka' momponyata' kasala'an nu to mia-mian anu mompisala'i ia.

Polaya' nu jama'at atina'mo mian anu mongatun pakalaja'an nu Tumpu, ia madi' timbali ko kasala'annyo. Ia madi' timbali kobubuun kabai saja' pusa, kabai saja' malangu, kabai mongka'ima'i mahantuda', kabai kinyonyoa saja' mompopikilakon doi. Ia tionyo ahi' sanang na montalima mian anu sonsoo' i laigannyo, mongka'ima'i hahan anu ma'ima', timbali mongatun butong, jujun, susi' ka' ta'atun.

Samian na polaya' nu jama'at tionyo ahi' samian anu madi' ko kasala'annyo; ia tionyo ko bengkele' ola samian; to ana-anaknyo tionyo ahi' pinalesayamo hi Kristus ka' misa' sumo to ana-anak anu lausala ka' anu madi' opoko ala o atun.