Popular Bible Verses from Roma 8

Share

Ane mampokarimaki Pueꞌ Ala hei ane Nowowoiki hintotoꞌ hante tungkaihaNa, lekiꞌ-lekiꞌna to mewali i lali kotuwuꞌta bateꞌna nopakeꞌ Pueꞌ Ala hingkeꞌna modumbuꞌ i ingkiꞌ.

Alaꞌ kubahaꞌ mpololeke, hawaꞌi uwaꞌ to wadi mokaꞌaki ka komarimana Pueꞌ Ala: Moromiꞌ kotuwuꞌ ba komahia moromiꞌ malaꞌeka ba kuasaꞌ to kodake, ba pepororokaꞌ moromiꞌ to mewali hinewowoꞌena, moromiꞌ to mewali i ando to hingkiꞌ dongkaꞌ, moromiꞌ kuasaꞌ i laniꞌ ba i duniaꞌ, hawaꞌi uwaꞌ hapolu to wadi mokaꞌaki ka komarimana Pueꞌ Ala to tohua alaꞌ pohaꞌanunta hante Pueꞌta Yesu Kerisitu.

Ingkiꞌ toaꞌ to moledeꞌ, hawaꞌi tobahaꞌ hapo to hangangaa totiꞌi ane mekokaeki. Angkana Inohaꞌ Mangkolehi mosulungiki alaꞌ Nobahaꞌmoꞌi hapo to toparalu, hei i hinarona Pueꞌ Ala, Io to mampowute perapiꞌta to hawaꞌi tobiaꞌ topohowaꞌ.

Hapo tene to wadi hingkiꞌ totiꞌi noniuꞌ i lekiꞌ-lekiꞌna to nowali Pueꞌ Ala tiꞌo? Ane Pueꞌ Ala tinaꞌ i ingkiꞌ, himo tenoreꞌi to pobiaꞌ moꞌewaki? Hawaꞌi uwaꞌ!

Hinewowoꞌena, hamboaꞌmo uwaꞌ pehuku i himolu toaꞌ to mohaꞌanu hante Yesu Kerisitu.

Hihimolu toaꞌ to mampohimpodulu peleihana lalina to kodake, monontomo kopahuane komahia to mokaꞌaki ka Pueꞌ Ala. Angkana hihimolu to mampohimpodulu peleihana Inohaꞌ Mangkolehi, iomo tiꞌo to pahua kotuwuꞌ to wolaꞌ hei mohaꞌanu hante Pueꞌ Ala.

Kehapoꞌi ba hapolu to morumpaki, bateꞌna penaniki nturusi, hei makaja mpololeke penaninte alaꞌ komarimana hi Yesu i ingkiꞌ!

Kubahaꞌ mpololeke, lekiꞌ-lekiꞌna komaporiꞌ to tohua i duniaꞌ hinewowoꞌena hawaꞌi mopalaiha, alaꞌ manobaꞌ tene kotuwuꞌ to tohua intu i ando to hingkiꞌ dongkaꞌ.

Uwaꞌreꞌi to wadi mokaꞌaki ka komarimana Kerisitu? Kehapoki norumpa komasusa, ba komaporiꞌ, ba poperima-rima, ba kobiloraha, ba komakuraꞌa, ba pepororokaꞌ, ba perorokoꞌ, bateꞌna hawaꞌki tekaꞌa ka rimana Kerisitu.

Hei Pueꞌ Ala to pobahaꞌ lalina toaꞌ, pobahaꞌ woꞌo peleihana Inohaꞌ Mangkolehi, alaꞌ ingkiꞌ lekiꞌ-lekiꞌta toaꞌna Pueꞌ Ala to nopekokaeki Inohaꞌ Mangkolehi motuntuni peleihana Pueꞌ Ala.

Hihimolu toaꞌ to noranda Inohaꞌna Pueꞌ Ala, iomo anaꞌne Pueꞌ Ala.

Toaꞌ to mampetuntuiluhi peleihana lalira to kodake, motuntuniluhi hapo to ropekiri i lalira. Angkana toaꞌ to mampekiri hibobali hante Inohaꞌna Pueꞌ Ala, hingkiꞌ mampekirihi nturusi walia to mampomotanaꞌ Inohaꞌna Pueꞌ Ala.

Howeꞌ, AnaꞌNa to hadoduona, hawaꞌi Nopekabohiꞌ mahi mohompoꞌki, hapona tene i langkaꞌ-langkaꞌ to modumbuꞌ mpololeke i lali kotuwuꞌta Nopepaꞌaniki.

Alaꞌ Inohaꞌ Mangkolehi moꞌawa hante lalinta mantiꞌi koꞌingkiꞌna anaꞌne Pueꞌ Ala. Mewaliꞌ, ane nopoꞌanaꞌmoki Pueꞌ Ala, tobahaꞌ hingkiꞌ mewaliki to moꞌompui manaꞌ, hei hingkiꞌ pahuaki dolaꞌta to nopatimomomo Pueꞌ Ala i ingkiꞌ anaꞌNa. Lekiꞌ-lekiꞌna tiꞌo tohua moꞌawa hante Kerisitu, alaꞌ i duniaꞌ hieꞌe, ane ingkiꞌ nipoperima-rima hibali hante Kerisitu, i ando pobutusi hingkiꞌ pahuaki woꞌo kotuwuꞌ to manobaꞌ moꞌawa hante hi Yesu.

Toaꞌ to motuntuni peleihana lalina to kodake, moꞌewa Pueꞌ Ala. Hawaꞌi mengkoruꞌ i hawaꞌNa, alaꞌ hawaꞌi nobiaꞌ.

Hinewowoꞌena, lekiꞌ-lekiꞌna ohi duniaꞌ to nowali Pueꞌ Ala, mampekau-kau tempona Pueꞌ Ala hingkiꞌ mampotongawa himo to mewalimo anaꞌ-anaꞌNe.

Halali-halali, tobahaꞌ wute hinewowoꞌena lekiꞌ-lekiꞌna ohi duniaꞌ merorai nturusi. Komaporiꞌna duniaꞌ hieꞌe hibali komaporiꞌna towoweꞌe to notokoꞌi.